मुख्यमंत्री सुशासन फेलोशिप ले युवा मन ल मिलही प्रशासनिक क्षेत्र म करियर के मौका
IIM रायपुर के सहयोग ले चलत दू साल के MBA कार्यक्रम बर जागरूकता अभियान तेज
रायपुर. मुख्यमंत्री विष्णु देव साय के नेतृत्व म छत्तीसगढ़ के युवा मन ल सुशासन अउ पब्लिक पॉलिसी के क्षेत्र म आगू बढ़ाए के उद्देश्य ले “मुख्यमंत्री सुशासन फेलोशिप” के तहत चलइया ‘दू वर्षीय MBA इन पब्लिक पॉलिसी एंड गवर्नेंस’ कार्यक्रम के बड़ पैमाना म प्रचार-प्रसार करे जात हे।
ए कड़ी म भारतीय प्रबंध संस्थान (IIM) रायपुर के प्रतिनिधि बिनॉय टी अउ एस.एन. मंडल कोति ले जशपुर समेत प्रदेश के उत्तरी जिला मन के दौरा करके लइका मन ल ए कोर्स के जानकारी दे जात हे। टीम ह अलग-अलग इंजीनियरिंग अउ स्नातक कॉलेज मन म पहुँच के कार्यक्रम के विशेषता, पात्रता अउ आवेदन करे के तरीका के बारे म विस्तार ले बतावत हें। संग म पंपलेट बाँट के घलोक जादा ले जादा युवा मन तक जानकारी पहुँचाए जात हे।
ये कार्यक्रम छत्तीसगढ़ सासन अउ IIM रायपुर के संजुत प्रयास ले चलाए जात हे, जेखर तहत चुने गे अभ्यर्थी मन के पूरा फीस राज्य सरकार ह भरही। एखर संग लइका मन ल हर महीना 50 हजार रूपया के छात्रवृत्ति घलोक दे जाही।
ए कार्यक्रम के खास बात ये हे कि अभ्यर्थी मन ल IIM रायपुर म ऊँच स्तर के पढ़ाई के संग-संग राज्य सरकार के अलग-अलग विभाग मन म व्यावहारिक ट्रेनिंग (फील्ड एक्सपोजर) के घलो मौका मिलही। एखर ले ओमन ल नीति निर्माण अउ प्रशासनिक काम-काज के असली अनुभव मिलही।
ये फेलोशिप खास करके छत्तीसगढ़ के मूल निवासी मन बर हे अउ ओमा राज्य सरकार के आरक्षण नीति लागू होही। इच्छुक अभ्यर्थी जादा जानकारी अउ आवेदन बर IIM रायपुर के आधिकारिक वेबसाइट म जाके तय तारीख तक फॉर्म भर सकत हें।
बता दन कि IIM रायपुर के टीम ह जशपुर जिला के जम्मो विकासखंड के कॉलेज मन म जाके लइका मन ल ए महत्वाकांक्षी कार्यक्रम ले जोड़े के कोसिस करत हे, जेकर ले प्रदेश के होनहार युवा मन ल सुशासन के क्षेत्र म करियर बनाए के सुनहरा मौका मिल सके।
