बस्तरिया ‘बस्तर सागा’ ह फिलिम दुनिया म मचाही धूम

 मुरिया जनजाति के जीवनसैली म बने हे फिलिम                                   रायपुर.अबूझमाड़ म रहइया मुरिया जनजाति के जीवनसैली ल अब जम्मो संसार के मनखे मन देखहीं.एखर बर बस्तर सागा नाम के फिलिम बनके तियार हे. ए फिल्म ल इंटरनेशनल गोवा फिल्म फेस्टिवल के वर्किंग कैटेगरी म चुने गे हे। फेस्टिवल बर चुनेगे विश्व के 200 फिल्म मन म बस्तर सागा सामिल हे.

सवा घंटा के ए फिल्म ल नारायणपुर के दिनेश नाग ह बनाए हे. उमन ए फिलिम म हीरो के रोल निभाए हे. दिनेश ह पाछू 15 बछर ले मुंबई म रहिके बॉलीवुड म काम करत हवय. वो ह मुंबई म अपन संगी मन के आघू अबूझमाड़ के थीम उपर काम करे के प्रस्ताव रखिस. एखर बाद डायरेक्टर अमोल चौधरी ह एमा फिल्म बनाए बर तियार हो गे। ए फिल्म के प्रोड्यूसर घलो अमोल ही हे.

मिले जानकारी म रायपुर के रहवइया राज बंजारे ह फिल्म बर कहानी लिखिस, हम आप ल बता देवन के राज ह एफटीआई ले पास आउट हे. एकर पाछू करीबन तीन महीना के सूटिंग के बाद ए फिल्म तियार हो गिस. पाछू बरीस म गोवा फिल्म फेस्टिवल म ए फिल्म ल दुनिया के 200 वर्किंग कैटेगरी के फिल्म मन म सामिल करे गिस. अब फिल्म ल इंटरनेशनल फिल्म फेस्टिवल म ले जाय के तियारी हवय.

दिनेश के बॉलीवुड के सफर के बारे म बताथें के उमन ह नारायणपुर के रामकृष्ण आश्रम म रहिके 12वीं तक के पढ़ाई करिस। एखर बाद दिनेश भिलाई के कल्याण कॉलेज म आइस अउ थियेटर ले जुड़ गे. एखर बाद वो ह नेशनल स्कूल ऑफ ड्रामा ले पास आउट अभिनेता मन ले मिलीस अऊ भोपाल, दिल्ली जाके थियेटर करे लागिस.

दिनेश 2006 म मुंबई पहुंचिस, 2009 म ओ ला रजत कपूर के संग फंस गे रे ओबामा फिल्म म एक कॉमिक रोल करे के मउका मिलिस, जेमा ओला बॉलीवुड म पहिचान मिलिस। एखर ले पहिली ओ ह छोटे- मोटे रोल फिल्म मन म करे रहिस। एखर बाद आई जॉली एलएलबी 2 म घलोक वो ह काम करे रहिस।

आदिवासी मन ह फिल्म म निभाए हे भूमिका

फिल्म म लीड रोल निभाए दिनेश नाग बताइस के फिल्म के हर सीन ल जीवंत अऊ अंतर्राष्ट्रीय सिनेमा के जइसे बनाए बर अबूझमाड़ के आदिवासी मन ल ही रोल दे गे हे। फिल्म मुरिया बोली म रिलीज करे जाही। फेस्टिवल बर फिल्म ल अलग-अलग भाखा म सब टाइटल करे जाही। फिल्म म दिनेश के संग अभिनेत्री के तउर म महाराष्ट्रीयन सिनेमा ले प्राजक्ता वाडे अऊ बाल कलाकार के रूप म माड़ के ही व्यास देव के अभिनय देखे ल मिलही।