जय जोहार रायपुर…दीपक ५२कर.. राज्य सरकार ये बार बस्तर ल मलेरिया मुक्त करे बर ठान ले हे , मलेरिया मुक्त बस्तर अभियान चलाय जात हे, एखर बर सतरह सौ बीस टीम बने हे जेन मन बस्तर के एक एक गाँव म जा के मलेरिया के सघन जांच करत हे अऊ त्वरित उपचार के व्यवस्था करत हे , स्कूल , आश्रम , छात्रावास के संगे संग पैरा मिलेट्री कैंप म घलो जा के मलेरिया के जांच करत हे.
बस्तर संभाग के 26 विकासखंडों म ये गहन अभियान संचालित करे जात हे, दंतेवाड़ा, बीजापुर, सुकमा अऊ नारायणपुर जिला के सब्बो विकासखंड म अऊ बस्तर जिला के बड़े किलेपाल, तोकापाल अऊ दरभा विकासखंड के पूरा क्षेत्र म संगे संग लोहंडीगुड़ा, नानगूर अऊ बस्तर विकासखंड के 15 उपस्वास्थ्य केंद्र म, कांकेर के भानुप्रतापपुर, दुर्गकोंदल अऊ कोयलीबेड़ा के 10 उपस्वास्थ्य केंद्र म अऊ कोंडागांव जिला के माकड़ी, केशकाल, कोंडागांव अऊ फरसगांव विकासखंड के 14 उपस्वास्थ्य केंद्र के अंतर्गत आए वाला क्षेत्र म ये अभियान चलाये जात हे.अभियान के दौरान 26 विकासखंड के कुल 430 उपस्वास्थ्य केन्द्र के माध्यम ले एक हजार 823 गांव म मलेरिया के पहचान अऊ इलाज करे जाहि.
