बदलत बस्तर के नवां तस्वीर, बंदूक के साए ले सुशासन के छांव तक

• बाइक म सवार होकर नक्सली मन के गढ़ रहे गांव मन म पहुंचे कलेक्टर-सीईओ
• पहुंच ले दूरिहा गांव मैलासुर, दंतेषपुरम, गछनपल्ली अउ बुर्कलंका म ग्रामीण ला दिहिन सौगात
• स्कूल, अस्पताल, सड़क, पुल-पुलिया निरमाण के तुरते मंजूरी

रायपुर, बस्तर के सुदूर वनांचल मन ले डर अउ उपेक्षा के अंधियारी अब छंटे लग गे हे, अउ एकर गवाह बनीस सुकमा के ओ तस्वीर मन जिहां जिला के मुखिया मन खुद दुर्गम रद्दा मन के परवाह करे बिना जनता के दुआर तक पहुंचत हें। कलेक्टर अमित कुमार अउ जिला सीईओ मुकुन्द ठाकुर ह कोंटा बिकासखंड के धुर नक्सल प्रभावित रहे अउ पहुंच ले दूरिहा गांव मन—भेज्जी, मैलापुर, दंतेशपुरम, बुर्कलंका, गछनपल्ली, बोदराजपदर अउ डब्बाकोंटा के ऐतिहासिक दौरा करिन। बछर मन ले मुख्यधारा ले कटे ए गांव मन के उबड़-खाबड़ अउ पथरा ले भरे रद्दा मन म जब अधिकारी मन के काफिला मोटरसाइकिल म सवार होकर निकलीस, त ए सिरिफ एक ठन देख-रेख (निरीक्षण) नोहे, भलुक ग्रामीण मन के मन म प्रसासन के ब्यवस्था बर एक अटूट बिसवास जगाय के सफर बन गे। आजादी के बाद पहिली बार कतनो कलेक्टर ला अपन बीच म पाके ग्रामीण मन के मूंह म खुसी खिल उठिस।

चौपाल म गोठ-बात अउ ‘सुशासन परिसर’ के सराहना

अधिकारी मन ह बुर्कलंका म बनत ‘सुशासन परिसर’ के बारीकी ले जांच-परख करिन। कलेक्टर अमित कुमार ह दुर्गम घने जंगल मन के बीच म बसे ए गांव म बने परिसर के मुक्तकंठ ले सरहाना करत एला प्रेरणादायी बतईन। ए बहुद्देशीय परिसर म एक ही बाउंड्रीवाल के भीतर स्कूल, आंगनबाड़ी, पंचायत भवन, पीडीएस सेंटर अउ सामुदायिक भवन ला समेटे गे हे, जेहा ग्रामीण मन ला एक ही छत के खला म जम्मो बुनियादी सुबिधा मन ला दे के एक अब्बड़ अछ्छा मॉडल आय। सुशासन सिविर के दउरान मैलासुर पंचायत म अधिकारी मन ह भुइँया म बइठके सरपंच, पटेल, मुखिया अउ ग्रामीण मन ले सोझे गोठ-बात करिन, सरकारी योजना मन के जमीनी सच ला जानिन अउ बनत काम मन ला समय म पूरा करे के कसम ला दोहराइन।

सवास्थ अउ सिच्छा के छेत्र म बड़े सौगात

प्रसासन के सबले बड़े धियान ग्रामीण मन के सेहत अउ लइका मन के सिच्छा ऊपर रहिस। कलेक्टर ह संबेदनसील पहल करत भेज्जी पंचायत म उप सवास्थ केंद्र के प्रसासकीय मंजूरी दिहिन, जबकि मैलासुर म एकर बर तुरते जगह तय करे के निरदेस दिहिन। गछनपाल्ली म सवास्थ करमी मन के रहे बर स्टाफ क्वार्टर ला मंजूरी दियय गिस, ताकि चौबीसों घंटा इलाज के सुबिधा मिल सकय। सिच्छा के अंजोर ला मजबूत करे बर दंतेषपुरम म बनत प्राथमिक शाला भवन ला बरसात के मौसम आये ले पहिली हर हाल म पूरा करे के निरदेस सिच्छा बिभाग ला दियय गिस, संग म भीतर के इलाका मन के स्कूल म मास्टर मन के उपस्थिति ला लेके कड़ा रुख अपनाय गिस।

पेयजल, आजीविका अउ खेती-किसानी ला मिलिस नवां जीवन

गांव मन म खुसहाली अउ आत्मनिर्भरता लाये बर कलेक्टर ह कमाई के नवां दुआर खोलिन। मैलासुर अउ दंतेषपुरम के ग्रामीण मन के मांग ऊपर मछरी पालन ला बढ़ावा दे बर तालाब मन के चिन्हांकन करे गिस अउ ग्रामीण मन ला मछरी बीज दे के निरदेस दियय गिस। पानी के किल्लत ला दूर करे बर दंतेषपुरम म एक नवां डैम अउ तालाब निरमाण के बड़े मंजूरी दियय गिस, संग म क्रेड़ा बिभाग ला पानी टंकी बनाये के निरदेस दिहिन। मैलासुर अउ बोदराजपदर म पीये के पानी के संकट ला खतम करे बर नवां हैंडपंप अउ बोरिंग के तुरते मंजूरी दियय गिस। पीएचई बिभाग ला साफ निरदेस दियय गिस कि जिन गांव मन म जल जीवन मिशन के काम पूरा हो चुके हे, उहां बिना देरी करे तुरते पानी के सप्लाय सुरू करे जाय, अउ जिहां काम पूरा नइ होय हे उहां तेजी ले काम पूरा करके ग्रामीण मन ला साफ पानी उपलब्ध कराय जाय।

कलेटर अमित कुमार ह बतईन कि दूरिहा अउ पहुंच ले बाहिर गांव मन म ‘सुशासन परिसर’ अउ बुनियादी सुबिधा मन के निरमाण बाथव म प्रेरणादायी हे। कलेक्टर ह कहीन कि हमर मुख्य उदेस्य नक्सलवाद के असर ले अजाद हो चुके ए आखिरी छोर के गांव मन तक बिकास के रफ्तार ला पहुंचाना आय। बरसात ले पहिली स्कूल, अस्पताल, सड़क, पुल-पुलिया अउ जल जीवन मिशन ले जुड़े जम्मो निरमाण काम मन ला पूरा गुनवत्ता के संग समय म पूरा करे जाही, ताकि हर ग्रामीण तक सासन के योजना मन के सोझे लाभ पहुंच सकय।

सड़क मन ले जुड़िहें दिल अउ रद्दा, बिकास के रफ्तार होही तेज

बस्तर के बिकास म सबले बड़े बाधा रहे पहुंच विहीन रद्दा मन ला अब पक्की सड़क मन के मजबूती मिले बर जावत हे। कलेक्टर ह बोदराजपदर, मैलासुर, दंतेशपुरम, गछनपल्ली अउ बुर्कलंका ला मुख्य सड़क मन ले जोड़े बर प्रधानमंत्री ग्राम सड़क योजना (पीएमजेएसवाई) के तुरते प्रस्ताव तैयार करके जरूरी कारवाही करे के कड़े निरदेस बिभागीय अधिकारी मन ला दिहिन। आरईएस बिभाग कोती ले डब्बाकोंटा म बनत आश्रम के घलो मुआयना करे गिस। मोटरसाइकिल के पहिया मन ले सुरू होय प्रसासन के ए सफर ह सुकमा के ए दूरिहा अंचल मन म बिकास के नवां कहानी लिख गे हे, जेहा ए साबित करथे कि नक्सलवाद के खात्मा के बाद अब बस्तर के पहचान बंदूक ले नोहे, भलुक सुशासन अउ समृद्धि ले होवत हे।

कलेक्टर के निरीक्षण के दउरान एसडीएम कोंटा सुभाष शुक्ला, जनपद सीईओ सुमित ध्रुव, एडिशनल एसपी मनोज तिर्की, कार्यपालन अभियंता पीएमजेएसवाई रविंद्र ताती, महिला एवं बाल विकास अधिकारी रितिश टंडन, बीएमओ डॉ. दीपेश चंद्राकर संग दूसर जिला अधिकारी मन मउका म उपस्थित रहिन।

हमर व्हाट्सएप चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
YouTube –https://youtube.com/@jayjohar?si=AZDI5zciOCT3Oqhw
Facebook –https://www.facebook.com/share/18GsFBTgfd/