बस्तर के नवा पहिचान: जंगल में फेंकाय वाला छिंद के बीजा ले तइयार होइस अनोखा हर्बल कॉफी
युवा उद्यमी विशाल हालदार के कमाल; कचरा ले कंचन बनाय के नवाचार ला मुख्यमंत्री घलो सराहिस
रायपुर, छिंद, खजूर अउ पाम के बेकार बीजा ले अब स्वास्थ्य बर गुनकारी अउ सुवादिस हर्बल कॉफी बनाय जावत हे। ये नवा काम न केवल बेकार बीजा के सही उपयोग करथे, बल्कि सेहत बर बने कैफीन-मुक्त पेय घलो देथे। ये कॉफी में कैफीन नइ हे, जेकर से ये अनिद्रा, हाई ब्लड प्रेशर अउ एसिडिटी के मरीज बर एक बढ़िया बिकल्प आय। ये नवाचार न केवल पर्यावरण बर बने हे, बल्कि छत्तीसगढ़ के गांव-गंवई के अर्थव्यवस्था ला मजबूत करे के कोति एक बड़े मील के पत्थर साबित होही।
बस्तर के सुग्घर हरियाली अब सिरिफ़ ओकर सुंदरता बर नइ, बल्कि एक महकत क्रांति बर घलो जानल जाही। दंतेवाड़ा जिला के बचेली में रहइया युवा नवाचारी विशाल हालदार ह अपन माटी ले जुड़ के एक अइसन प्रयोग करिस, जेकर से बेकार समझे जाय वाला चीज ह कीमती बन गे। विशाल ह छिंद के बीजा ले कैफीन मुक्त हर्बल कॉफी तइयार करके ‘आत्मनिर्भर भारत’ कोति एक बड़े कदम बढ़ाए हे।
नवाचार: कचरा ले कंचन तक के सफर
बीकॉम अउ सॉफ्टवेयर डेवलपमेंट के पढ़ाई करइया विशाल ह करीब दू साल के मेहनत अउ शोध के बाद ये हर्बल कॉफी ला बनाय हे। बस्तर के जंगल में छिंद के बीजा भारी मिथे, जेला लोगन मन फेंक देवत रहिन। ये कॉफी पूरी तरह कैफीन मुक्त हे, जेकर से सेहत ला कोनो नुकसान नइ होवय। एमां भरपूर मात्रा में एंटीऑक्सीडेंट्स पाय जाथे, जेकर से ये आम कॉफी ले जादा स्वास्थ्यवर्धक हे।
मुख्यमंत्री ह करिन सम्मानित, इनोवेशन महाकुंभ में रहिन अब्बल
विशाल के ये नवा प्रयोग ला शहीद महेंद्र कर्मा विश्वविद्यालय, जगदलपुर में होय ‘इनोवेशन महाकुंभ’ में पहिली नंबर मिलिस। मुख्यमंत्री विष्णुदेव साय ह विशाल ला ये उपलब्धि बर सम्मानित करिन। प्रदेश के वित्त मंत्री ओपी चौधरी अउ दूसर बड़े मनखे मन घलो ये कॉफी के सुवाद अउ महक के भारी तारीफ करिन हे।
स्थानीय रोजगार अउ उद्यमिता के नवा मॉडल
विशाल हालदार के लछ्य सिरिफ़ सामान बेचना नइ हे, बल्कि बस्तर के जुवा मन ला स्वावलंबी बनाना घलो हे। दंतेवाड़ा जिला प्रशासन के मदद ले ओमन स्थानीय युवा मन ला व्यापार बर प्रोत्साहित करत हें। ये प्रोजेक्ट ले गांव अउ जंगल ले छिंद के बीजा बटोरइया ग्रामीण ला कमाई के एक नवा जरिया मिलही। विशाल के कहना हे कि यदि सोच साफ होवय त स्थानीय ‘वेस्ट’ ला घलो ‘बेस्ट’ बनाय जा सकथे। ये हर्बल कॉफी आने वाला बखत में दुनिया बर बस्तर के एक अनमोल भेंट साबित होही।
खजूर के बीजा में एंटीऑक्सीडेंट्स अउ ओलिक एसिड भरपूर होथे, जो दिल अउ पाचन बर बने रहिथे। अभी ये प्रोजेक्ट टेस्टिंग के आखिरी दौर में हे। जल्दी ही एकर आधिकारिक लॉन्चिंग होही, जेकर बाद बस्तर के ये हर्बल कॉफी बाजार में अपन खुशबू बिखेरी।
