राष्ट्रीय रामायण महोत्सवः कंबोडिया अऊ थाईलैंड के संगे-संग 12 राज्य के रामायण मंडली मन दिही अपन प्रस्तुति
अरण्यकाण्ड के प्रसंग के होही विशेष मंचन, कला-संस्कृति के समृद्ध परंपरा के दिखही संगम, मशहूर कलाकार मन घलो संघरही
1 जून ले 3 जून रामभक्ति के रस
रायपुर. राष्ट्रीय रामायण महोत्सव के संस्कृति विभाग डाहर ले बड़ जोर सोर ले तैयारी करे जात हे। ए आय़ोजन म संघरे बर कंबोडिया अऊ थाईलैंड ह घलो अपन मंजूरी दे दे हे। ए देश मन ले जुड़के रामायण मंडली ले जुड़े कलाकार मन अपन सुघ्घर प्रस्तुति दे बर अगोरा करत हे। रायगढ़ म 1 जून ले 3 जून तक चलईया ए महोत्सव म दूनों देस के अलावा छत्तीसगढ़ के संगे-संग 12 राज्य के रामायण मंडली रामायण ले जुड़े अलग-अलग प्रसंग के प्रस्तुति करही। ए महोत्सव म रामायण के अरण्य कांड ले जुड़े नृत्य नाटक के बिसेस प्रस्तुति करे जाही। एखर अलावा रोज हनुमान चालीसा के पाठ अऊ केलो आरती के घलो आय़ोजन होही।
राष्ट्रीय रामायण महोत्सव म छत्तीसगढ़ के कला-संस्कृति अऊ समृद्ध आतिथ्य के संगम देखे बर मिलही। रायगढ़ कलेक्टर तारण प्रकाश सिन्हा महोत्सव के तैयारी ल लेके अधिकारी मन ल लगातार जानकारी लेवत हे कि तैयारी कहां पहुंचे हे। ओमन हाल के बेरा म समीक्षा कर जरूरी दिसा निर्देस अधिकारी मन ल दिन हे। 1 जून ले ए महोत्सव के सुरूआत होही जेमा प्रतिभागी दल मन के मार्च पास्ट कराए जाही। दोपहर 3 बजे ले रामायण मंडली मन के प्रस्तुति सुरू होही। संझा म इंडियन आइडल फेम प्रसिद्ध सिंगर शन्मुख प्रिया अऊ शरद शर्मा के परफारमेंस होही।
महोत्सव के दूसर दिन यानि 02 जून के दोपहर तीन बजे ले रामायण मंडली मन के फेर प्रस्तुति होही। संझा कुन देंगी प्रसिद्ध गायक बाबा रघुवंशी अऊ भजन गायक लखबीर सिंह लक्खा के कार्यक्रम होही। कार्यक्रम के समापन 03 जून के दोपहर 03 बजे मंडली मन के अंतिम प्रस्तुति होही। संझा 6 बजे केलो महाआरती अऊ दीपदान के कार्यक्रम होही। एखर बाद पश्चात प्रख्यात कवि कुमार विश्वास ह रामकथा कहिही अऊ प्रसिद्ध गायिका मैथिली ठाकुर ह अपन भजन के प्रस्तुति देही।
