दुर्ग. वईसे त सादी अब्बड़ होथे. जेमा आवइया मेहमान दूल्हा-दुल्हन ल तोहफा दे के भूल जाथे, लेकिन भिलाई म 19 अप्रैल के एक अइसन सादी होय बर जात हे, जिहां लोगन मन के देगे… उपहार जीवनभर याद रखे जाही…
भिलाई म बीएसपी कर्मी संजय पांडेय अपन बेटी ल एक अइसे उपहार देवत हे. जेमा लोगन जीवनभर याद रखही. श्रद्धा के पिता संजय पाण्डेय ह ये सादी ल यादगार बनाए बर 11 सौ लोग न मन ले नेत्रदान के संकल्प कराही. जेखर ले नेत्रहीन लोगन मन के दुनिया घलोक रोसन हो सकय. कोनो सादी म एक संग नेत्रदान के ये पहिली रिकॉर्ड होही, उहें संजय पर्यावरण संरक्षन बर सादी म आवइया मेहमान मन ल फलदार पऊधा घलो भेंट करही.
दरअसल बीएसपी कर्मी संजय पांडे ह अपन जीवन म आंखी ले होय परेसानी ल झेलत हे. दू साल तक संजय आंखी के बेमारी ले परेसान रिहिस हे. उमन ल अपन निजी काम मन म बहुत परेसानी मन ल झेले बर पड़िस. लइका मन के सहारा लेना पड़त रिहिस हे. महंगा इलाज के बाद संजय के आंखी ठीक हो इस. अब संजय ह अपन बेटी श्रद्धा के सादी म गरीब नेत्रहीन लोगन बर आंखी के बेवस्था करे के संकल्प लिस हे अउ अपन बेटी के सादी म आवइया मन ले मेहमान मन ले नेत्रदान के संकल्प पत्र उपहार म लाए के गुजारिस करिस हे.
संजय पांडे के पत्नी गीता पांडेय अउ बेटी श्रद्धा ये बात ल लेके बेहद उत्साहित अउ खुस हवय. के उंखर इहां सादी म लोगन अइसन संकल्प करे बर जात हे. ये सादी म भिलाईवासी मन ह एक बार फेर 100 फीट ऊपर एयर बैलून म वर-वधू के वरमाला के दृश्य घलो देखे बर मिलही… संजय पांडे के कहिना हे के बिटिया परी होथे अउ परी आसमान मन म होथे. येखर बर ये सादी म हॉट एयर बैलून के माध्यम ले आसमान म वरमाला के रस्म होही.
