जाति मामला म अमित जोगी ल बड़ राहत…… हाईकोर्ट ह खारिज करिस याचिका

रायपुर/बिलासपुर। फर्जी नागरिकता व जाति प्रमान पत्र देय अउ अवैधानिक तरीका ले चुनाव लड़े के आरोप मन के आधार म अमित जोगी के खेलाफ हाईकोर्ट म लगाए गे याचिका पांच साल के सुनवाई बाद खारिज कर दे गिस।  कोर्ट के फइसला के बाद जनता कांग्रेस के नेता ह खुसी जाहिर करत हुए ट्वीट करिन।  ट्वीट म जोगी ह लिखे हे के, सच के जीत होइस हे। बीजेपी 4 सीजी स्टेट प्रत्यासी समीरा पैकरा ह मोर विरुद्ध तथाकथित गलत जन्म-तिथि बताए, फर्जी नागरिकता अउ जाति प्रमान पत्र देय अउ अवैधानिक तरीका ले  चुनाव लड़े के झूठा आरोप लगाए रहिस हे।

अपन पक्ष म फइसला आत ही अमित जोगी ह राष्ट्रीय अनुसूचित जनजाति आयोग के अध्यक्ष नंदकुमार साय ल घलो निसाना म  लिस।  जोगी ह कहिन के, समीरा पैकरा के माध्यम ले याचिका लगाए बर  नंदकुमार ह ही उकसाय रहिस हे। जोगी ह एक अन्य ट्वीट म सीएम भूपेश वघेल उपर घलो आरोप लगाइस के,  उंखर  मिलीभगत ले जे चुनाव याचिका लगाए गे रहिस हे, ओला पांच साल के सुनवाई के बाद आज माननीय उच्च न्यायालय ह सिरा ले खारिज कर दिस। मरवाही के जनता के ऐतिहासिक जनादेश ल स्वीकार करइया माननीय न्यायालय के आदेस  के मैं सम्मान करत हव।