बिलासपुर. बिलासपुर जिला में विकास बर बहुत अकन महत्वाकांक्षी परियोजना बनाय गेहे। फेर कई बछर बीते के बाद घलो परियोजना मन साकार नी हो पावत हे।
बिलासपुर के जनता बर बनाय एक अउ बड़े परियोजना में हवई सेवा घलो हे। फेर सालों बाद अब तक शुरू नी हो पाय हे। करीब 29 करोड़ के एयरपोर्ट के विकास बर मिले रिहिस , जेहा अभी खर्च नी हो पाए हे न ही काम पूरा होय हे। 6 दिसम्बर 2018 के बिलासपुर एयरपोर्ट ल भारत सरकार ले कार्मिशियल फ्लाइट बर लाइसेंस मिल गेहे।
डायरेक्टर जनरल आफ सिविल एविएशन ह लाइसेंस खातिर छत्तीसगढ़ सरकार अउर एयरपोर्ट अथारिटी ल चिट्ठी लिखे रिहिस येकर बाद आस जगे रिहिस कि बहुत जल्द बिलासपुर के हवई सेवा शुरू हो जाही। फेर येहा अतका आसान घलो नी रिहिस।
रायपुर अउ जगदलपुर के बाद छत्तीसगढ़ के ये तीसरा एयरपोर्ट हरे। फेर कतको कमी के कारण अभी तक ये शुरू नी हो पाय हे। ऐ प्रोजेक्ट में करोड़ो रूपये खर्च कर दे गेहे। फेर फ्लाइट बर अब तक सर्वे के काम पूरा नी हो पाय हे।
डायरेक्टर एयरपोर्ट चकरभाठा नागसम्प वीरेंद्र सिंह के कहना हे कि काम पूरा नी हो पाय हे। कतको खामी ल पूरा नी करे गेहे।अधिकारी मन ले मिले जानकारी ले सबले बड़े खामी रनवे में है। एयरपोर्ट के रनवे अतका छोटे हे कि एयरबस के सुविधा नी ले जा सके। एयरपोर्ट अथॉरिटी ह कोनो बात के ध्यान नी देवत हे। अब देखना हे कि स्मार्ट सिटी ल कब तक उड़ान सेवा मिल पात हे।
।
