भाजपा पार्षद मन नई आइन , नवा महापौर के पहिली बैठक म, एजाज किहिस दुर्भाग्य जनक

जय जोहार रायपुर.. नवा महापौर एजाज ढेबर ह आज सब्बो सत्तर पार्षद मन संग एक बैठक के एलान करे रिहिस ताकि सब्बो ले मेल मुलाक़ात घलो हो जाय अऊ नवा पार्षद मन ल काम करे के तरिका घलो बताय जा सके, लेकिन ये बैठक के भाजपा पार्षद मन बहिष्कार कर दिन अऊ कोनो नइ पहुंचिस.

बैठक तो होईस जेमा महापौर ह एक घोषणा करे हे कि रायपुर के कोनो व्यक्ति ले यूजर्स चार्ज नई ले जाहि काबर कि पब्लिक निगम ल जल,मल अऊ जमीन के टैक्स देवत हे ओखर ऊपर ये चार्ज जादा हे तेखर सेती एला बंद करे जात हे.

भाजपा पार्षद मन के अनुपस्थिति ल ले के महापौर ह किहिस कि ये बहुत ही दुर्भाग्य जनक बात हे, भाजपा वाले मन जनहित के काम म घलो राजनीति करथे, ओमन अपन पार्टी के हार ल बर्दाश्त नई कर पात हे.