युवती ल करिस बेहोश फेर बनाईस संबंध, बिडियो बना के अपन मां संग मिलके ब्लैकमेल

बलौदाबाजार. पहिली त 20 साल के युवती ल एक युवक ह अपन मया के जाल म फंसा लिस.. ओखर बाद अपन घर बुलाईस ताहन ओखर खाना म नशा के दवा मिला के ओला बेहोश करके ओखर संग संबंध बना लिस। कहानी इंहें नई खतम होए आरोपी युवक के मां ह ओखर मन के बिडियो बना लिस ताहन युवती ल ब्लैकमेल करना शुरू कर दिस।

मामला आए जिला के सिमगा थाना के जिहां घटना म आरोपी परिजन घलो ओखर साथ देत रिहिस। इही नहीं युवती ल ब्लैकमेल करके ओखर ले 4 लाख रुपिया घलो वसूल लिस। ए मामला म आरोपी युवक ल पुलिस ह गिरफ्तार कर ले हे संगे-संग मामला के दूसर आरोपी मन ल जांच के बाद गिरफ्तार करे जाही।

पुलिस ले मिले जानकारी के मुताबिक सिमगा थाना इलाका के 20 वर्षीय युवती ल चांपा के रहवईया मनीष बारले ह प्यार के जाल म फंसाईस। ओखर भरोसा जीते के बाद ओला अपन घर बुलाईस। आरोपी के मां ह युवती ल खाना म नशा के दवा मिला के दे दिस। ओखर बाद युवती बेहोश हो गे जेखर फायदा उठात आरोपी ह ओखर संग संबंध बना लिस। घटना के बिडियो आरोपी की मां ह बनाईस। बाद म युवक के बहिनी अऊ भाटों ह मिलके युवती ल ब्लैकमेल करे बर लागगे।

युवती के पिता ह कुछ समय पहिली पेन्ड्रा रोड म अपन जमीन बेचके 6 लाख रुपिया लाए रिहिस जेला युवती ल संभालके रखे बर दे रिहिस। जब पिता ल रुपिया के जरूरत पड़िस तब ओह रुपिया ल बेटी ले मांगिस। हिसाब के 4 लाख रुपिया कम रहिस ताहन कड़ाई ले पूछे के बाद युवती ह अपन आप-बीती ल बताईस। युवती अपन पिता ल बताईस कि आरोपी मन डाहर ल दे जात रहे धमकी ले किश्त म 4 लाख रुपिया ओमन ल दे दिस। एखर बाद ए जम्मो मामला पुलिस म पहुंचिस।