हफ्ताभर म सुलझईन हे अंधा कत्ल के गुत्थी, मृतक के पत्नी, प्रेमी समेत तीन गिरफ्तार
बीजापुर। मद्देड़ थाना पुलिस ह हफ्ताभर म एक अंधा कत्ल के गुत्थी ल सुलझईन हे। 15 जुलई के चिंताबागु नदी म एक अज्ञात शव अउ नदी किनारे म मोटर साइकिल मिले रिहिस। पुलिस ह ये मामला म मृतक के पत्नी समेत ओखर प्रेमी अउ एक अन्य आरोपी ल गिरफ्तार करिन हे।
बतात हे कि पुलिस ह मर्ग कायम कर जांच पड़ताल करिन त अज्ञात शव के शिनाख्त मट्टी मलैया पिता किस्टैया 27 साल, ऐचोड़ा गांव के रहवईया के रूप म करे गिस। ओखर सिर म चोट पहुंचा के अउ गला घोट के हत्या करे के बात आघू अईस ताहन पुलिस ह अज्ञात व्यक्ति के विरूद्ध अपराध पंजीबद्ध कर जांच म जुट गे रिहिन।
20 जुलई के सुरक्षा बल के साथ मृतक मट्टी मलैया गांव ऐंचोड़ा पहुंच के गांव वाले ले पूछताछ करिस त पता चलीस कि मृतक के पत्नि अउ मट्टी दिलीप के बीच सालों से प्रेम संबंध चल रिहीस। दू साल पाछू इही बात ल लेके गांव म सामाजिक बइठक म दूनो ल समझाईश दे गे रहीस। इही दउरान मृतक मट्टी मलैया अउ मट्टी दिलीप के बीच म विवाद हो गिस। शक के आधार म थाना मद्देड़ पुलिस ह मट्टी दिलीप अउ सोनू मट्टी ले पूछताछ करिन त वोमन ह कि मृतक के पत्नि अनिता मट्टी के कहे म ओखर पति के हत्या कर दिस। पुलिस ह आरोपी मन ल गिरफ्तार कर न्यायिक रिमांड म भेज दे गे हे।
