करारा जवाब बहादुर सैनिक मन ह मिलके देय हे पाकिस्तान ल

सबो पार्टी के विधायक मन वायुसेना के पराक्रम के सराहना करिस
रायपुर. विधानसभा म मंगलवार के पाकिस्तान म एयर स्ट्राइक के मामला उठिस.
स्पीकर डॉक्टर चरणदास महंत ह कहिन, सदन वायुसेना के पराक्रम के सराहना
करत हे. हमन देस के सेना अउ वायुसेना के संग हन.

मुख्यमंत्री भूपेश बघेल ह कहिन, दुनिया म भारतीय सेना सर्वश्रेष्ठ हवय.
हमव सेना के ए कार्रवाई के समर्थन करत हन. देस के जवान अतुलनीय हे.
संसदीय कार्यमंत्री रविन्द्र चौबे ह कहिन, एयरफोर्स के ए कार्रवाई के हमन
समर्थन करत हन. लेकिन उमन ए घलो कहिन, आखिर कश्मीर म आतंकवाद ए हालात तक कइसे पहुंचगे. एमा घलो चिंता करना चाही.

पुलवामा म पाक क कायराना हरकत रहिस हे

जेसीसी विधायक अउ पूर्व मुख्यमंत्री अजीत जोगी ह कहिन, पुलवामा म
पाकिस्तान ह कायराना हरकत करे रहिस हे. पाकिस्तान ल करारा जवाब बहादुर
सैनिक मन ह मिलके देय हे.पाकिस्तान के लांचिंग पैड ल खत्म करे हे. हम अपन
सेना ल सलाम करत हन. पाकिस्तान ल ए याद दिलाना चाहत हन, अइसे बेरा म भारत
एक हे. कोनो राजनीति नइ करना चाही. मैं सेना ल विसेषकर वायुसेना ल
धन्यवाद देवत हव.

नेता प्रतिपक्ष धरमलाल कौशिक ह कहिन, पाकिस्तान उपर हुए हमला ल लेके
एयरफोर्स ल बधाई. देस के भावना के अनुरूप ए कार्रवाई होइस हे. मंत्री
मो.अकबर ह कहिन, सबो आतंकी ठिकाना ध्वस्त करे जाना चाही. ए मानवीय मूल्य
के खेलाफ हे. हमन सेना के संग हमेसा खड़े हन.

पूरा देश ए चाहत रहिस हे ए कार्रवाई

बीजेपी विधायक अजय चन्द्राकर ह कहिन, रात 3.30 बजे पीओके म जे कार्रवाई
करे गिस .ए देस चाहत रहिस हे. पूरा सदन देस अउ सेना के संग हन. ए बात म
कोनो तरह के राजनीति नइ होना चाही. कश्मीर के हालात आज के नइए. कतको दशक
मन ले अइसे हालात बने हे. हमन सबो सेना के संग खड़े हन. बीजेपी विधायक
नारायण चंदेल ग कहिन, वायुसेना के ए कार्रवाई देस के जनमानस के भावना
रहिस हे.

बीजेपी विधायक बृजमोहन अग्रवाल ह कहिन, आज भारत के सेना ह कुशल नेतृत्व
के वजह ले पाकिस्तान उपर हमला करिस हे. भारत के सेना आंख उठाइया मन ल
करारा जवाब दे बर सक्षम हे. एमा राजनीति करना दुर्भाग्यपूर्न हे.

सईद अउ अजहर न मरय तब तक होवय बमबारी

जेसीसी विधायक धर्मजीत सिंह ह कहिन, मोला लगत हे के हाफ़िज़ सईद अउ मकसूद
अजहर नइ मरय हो ही, जब तक ए दूनों न मर जाए तब तक पाकिस्तान उपर बमबारी
होना चाही. दू गुंडे आ के इहां नुकसान पहुँच के चले जात हे, हमारा देस ए
कब तक बर्दास्त करही. लाहौर अउ मुज्जफराबाद भारत ले लगे हुए हे, उहां के
लाइट दिखथे. सेना चाहे तो दू दिन म उहाँ कब्जा कर सकत हे.

कांग्रेस विधायक मोहन मरकाम ह कहिन, ए कार्रवाई बर सेना ल बधाई, लेकिन
मुद्दा म मउजूदा सरकार वाहवाही लूटत हे, एखर ले पहिली घलो कतको बेर
सर्जिकल स्ट्राइक होइस हे. लेकिन कभु सरकार एखर राजनीतिक फायदा नउ उठाइस.
बीजेपी विधायक शिवरतन शर्मा ह कहिन के कश्मीर म हालात 1985 के बाद बिगड़े
हे.