Raipur : भरोसे का बजट: 4 नवा स्वामी आत्मानंद अंग्रेजी माध्यम महाविद्यालय के मिले हे सौगात
जय जोहार। (Raipur) मुख्यमंत्री भूपेश बघेल ह अपने कार्यकाल के पांचवां बजट पेश करे हे । ए बजट ल राज्य के सबो वर्ग के मनखे मन ल धियान में रखके तईयार करे गेहे । बजट म युवा ले लेके बुजुर्ग अउ महिला तक सबो बर विशेष प्रावधान करे हे । स्कूली शिक्षा ले लेके उच्च शिक्षा के छात्र बर घलो मुख्यमंत्री ह महत्वपूर्ण घोसना करे हे ।
स्वामी आत्मानंद स्कूल के संख्या ल बढ़ाय के संग कुछु चयनित महाविद्यालय म घलो अवइया सत्र ले अंग्रेजी माध्यम म शिक्षण प्रारंभ करे के निर्णय ले गेहे । संगेसंग ही आर्थिक रूप ले कमजोर छात्र ल शोध कार्य म सहयोग प्रदान करे बर राज्य रिसर्च फेलोशिप योजना प्रारंभ करे गेहे ।
बजट के माध्यम ले स्वामी आत्मानंद अंग्रेजी माध्यम विद्यालय ले कक्षा 12वीं उत्तीर्ण करइया विद्यार्थी ल अंग्रेजी माध्यम ले ही उच्च शिक्षा ल निरंतर रखे के सुविधा प्रदान करे के दृष्टि ले शिक्षा सत्र 2023-24 ले प्रदेस के चयनित महाविद्यालय म अंग्रेजी माध्यम ले शिक्षण प्रारंभ करे के निर्णय ले गेहे । प्रदेस म 101 नवा आत्मानंद अंग्रेजी विद्यालय खोले के घलो घोसना करे गेहे ।
स्वामी आत्मानंद अंग्रेजी माध्यम विद्यालय के तर्ज म महासमुंद, कोरबा, बिलासपुर अउ रायगढ़ जिला म अंग्रेजी माध्यम महाविद्यालय बर नवा सेटअप अउ प्रति भवन 12 करोड़ के लागत ले 4 महाविद्यालय भवन निर्माण करे जाही । रायपुर, दुर्ग, राजनांदगांव, कांकेर, बस्तर अउ अंबिकापुर म पूर्व ले स्वीकृत महाविद्यालय ल अंग्रेजी माध्यम म परिवर्तित करत हुए कुल 10 जिला म अंग्रेजी माध्यम आदर्श महाविद्यालय के संचालन प्रारंभ करे जाही ।
