कांकेर, कवर्धा, सरायपाली बर नॉन स्टॉप बस सेवा सुरू

रायपुर। परिवहन मंत्री राजेश मूणत ह सोमवार के राजधानी बस सेवा के सुभारंभ करिन। ये बस सेवा के पहिली चरन म रायपुर ले कांकेर, कवर्धा, सरायपाली बर सुरू करे गिस हे। उहें दूसर चरन में में राजनांदगांव समेत अन्य 19 मारम म सुरू करे जाही। परिवहन बेभाग ह राजधानी बस सेवा म लोगन ल सस्ता अउ सुगम सेवा मिले के दावा करिस हे। ये दावा घलो करिस के ये बस मन बिना रूके (नॉन स्टॉप) अपन तय करेगे जगा म पहुंचही।
मंत्री राजेश मूणत ह कहिन के सुरकछा अउ समय म बस चलाय बर सभी बस मन म जीपीएस अउ सीसीटीवी सिस्टम लगाय गे हे। संग म राजधानी बस सेवा म चलइया सबो बस मन पूरा तरह ले एसी अउ नॉन स्टॉप होही। येखर संग म दूसर सुविधा मन ल घलो देय जाही। जेखर ले 100 ले 150 किलोमीटर तक राजधानी आवइया मनखे मन ल सोझे लाभ मिलही।
बता दन के छत्तीसगढ़ म अब तक ये तरह के बस सेवा सुरू नइ करे गेहे। चुनावी बछर म यात्री मन बर ये एक महत्वपूरन सुविधा के रूप म देखे जात हे। येखर दूसर चरण के जल्द ही सुरू करे के बात कहे जात हे।