कांकेर सांसद विक्रम उसेंडी बनिस छत्तीसगढ़ भाजपा अध्यक्ष

रायपुर : छत्तीसगढ़ भाजपा के नवां प्रदेश अध्यक्ष के घोषणा कर दे गेहे. कांकेर लोकसभा सीट ले सांसद विक्रम उसेंडी ल भाजपा के नवां प्रदेश अध्यक्ष बनाय गे हे . धरमलाल कौशिक के नेता प्रतिपक्ष बनाए जाए के बाद ले ही भाजपा म नवा प्रदेश अध्यक्ष के नियुक्ति ल लेके चर्चा रहिस हे.

बीते गुरुवार के भाजपा के राष्ट्रीय अध्यक्ष अमित शाह छत्तीसगढ़ प्रवास म रहिन हे. एखर बाद आज नवा प्रदेश अध्यक्ष के घोषणा कर दे गिस हे.बता दे कि आगामी लोकसभा चुनाव के मद्देनजर प्रदेश अध्यक्ष पद म आदिवासी नेता के नियुक्ति काफी अहम माने जा त हे. काबर के हाल ही म होए विधानसभा चुनाव म भाजपा के करारी हार होइस हे. आदिवासी आरक्षित 29 म 20 ले अधिक सीट मन म भाजपा ल हार के सामना करना पड़िस हे.

सांसद रहत अंतागढ़ विधानसभा सीट ले चुनाव लड़े म खुद विक्रम उसेंडी ल ए बेर हार के सामना करना पड़िस हे. चर्चा हे कि आदिवासी नेता विक्रम उसेंडी ल नवा प्रदेश अध्यक्ष बनाके भाजपा लोकसभा चुनाव ले पहिली आदिवासी मन ल साधे के प्रयास करही.