chhattisgarh : पुरूष नसबंदी पखवाड़ा म उत्कृष्ट काम बर छत्तीसगढ़ ल मिलीन हे 3 पुरस्कार

जय जोहार । छत्तीसगढ़ (chhattisgarh ) ल पुरूष नसबंदी पखवाड़ा म उत्कृष्ट काम बर केन्द्रीय स्वास्थ्य अउ परिवार कल्याण मंत्रालय ह तीन पुरस्कार ले नवाजे हे । पुरुष नसबंदी पखवाड़ा के दउरान पिछले तीन बछर 2019 ले 2021 के बीच नसबंदी म छत्तीसगढ़ देस म पहला स्थान म हे । केंद्रीय स्वास्थ्य राज्यमंत्री डॉ. भारती प्रवीण पवार ह आज नई दिल्ली म आयोजित कार्यक्रम म प्रदेस ल ए उपलब्धि बर पुरस्कृत करीन । परिवार नियोजन कार्यक्रम के उप संचालक डॉ. टी.के. टोंडर अउ कंसल्टेंट डॉ. रोशन गुप्ता ह छत्तीसगढ़ डहार ले ए पुरस्कार ल ग्रहण करीन ।

पुरुष नसबंदी बर प्रदेस (chhattisgarh ) ल दू अउ श्रेणी म पुरस्कार प्राप्त होइन हे । सबले जादा पुरुष नसबंदी बर डॉ. संजय नवल ल राष्ट्रीय स्तर म दूसरा पुरस्कार मिले हे । पुरुष नसबंदी बर दम्पत्ति मोटिवेशन (प्रेरक) के श्रेणी म रायपुर जिला के तिल्दा के मितानिन श्रीमती केवरा वर्मा ल पुरस्कृत करे गेहे । मुख्यमंत्री भूपेश बघेल अउ स्वास्थ्य मंत्री टी.एस. सिंहदेव ह प्रदेस के ए उपलब्धि म स्वास्थ्य विभाग अउ राष्ट्रीय स्वास्थ्य मिसन के टीम ल बधाई दीन हे ।

परिवार नियोजन कार्यक्रम के उप संचालक डॉ. टी.के. टोंडर ह बताइन कि पुरूष नसबंदी पखवाड़ा के दउरान पिछले तीन बछर म प्रदेस म 3212 पुरुष के नसबंदी करे गेहे । पुरूष नसबंदी पखवाड़ा के दउरान बछर 2019-20 म 1695, बछर 2020-21 म 168 अउ बछर 2021-22 म 1349 पुरूष मन ह नसबंदी कराइन हे ।