Congress: बेरोजगारी ल मात देवत, अर्थव्यवस्था म नवा प्राण फूंकत हे छत्तीसगढ़ सरकार – वंदना राजपूत

जय जोहार…. प्रदेश कांग्रेस (Congress) प्रवक्ता वंदना राजपूत ह कहिन कि कोरोना महामारी के विषम परिस्थिति म घलो कांग्रेस सरकार के जन हितैषी नीति के सती छत्तीतसगढ़ म बेरोजगारी दर सितंबर 2020 म घट के 2 प्रतिशत रह गे हे।

छत्तीसगढ़ के लोगन मन ल गर्व हे अपन मुख्यमंत्री पर, जेन हरेक कदम म अपन छत्तीसगढ़ के नाम ल रोशन करत हे। प्रदेश कांग्रेस (Congress) प्रवक्ता वंदना राजपूत ह कहिन कि छत्तीसगढ़ म महिला सशक्तिकरण ह मिसाल बनत हे। पहिले महिला मन करा रोजगार नई रहत रिहिन, लेकिन अब महिला मन ह नरवा, गरवा, घुरवा, बारी अऊ आन योजना ले स्वयं सहायता समूह ले जुड़ के रोजगार प्राप्त करत हे।

अब गोबर के उपयोग ह व्यवसायिक रूप म होवत हे। गोबर ले कंडे ही नई बलकी दीया, गमला अऊ आन वस्तु घलो बने ल लगे हे। महुआ समेत आन वनोज ले महिला मन ह सेनिटाइजर के निर्माण करत हे। महिला मन के स्थिति ह बेहतर होवत जावत हे। परिवार म आर्थिक रूप ले सहयोग घलो करत हे।

प्रदेश कांग्रेस (Congress) प्रवक्ता वंदना राजपूत ह कहिन कि पूर्ववर्ती सरकार ह 15 वर्ष तक शासन म रिहिन, लेकिन महिला सशक्तिकरण म कभी धियान नई दिस। आज भूपेश बघेल के सरकार म छत्तीसगढ़ के तस्वीर बदलत हे। विकास के नवा प्रतिमान स्थापित करत हुये बेरोजगारी ल मात देवत अऊ अर्थव्यवस्था म छत्तीसगढ़ सरकार ह नवा प्राण फूंकत हे।