सिंहदेव के बयान म का बोलिस पुनिया

 रायपुर। कांग्रेस के छत्तीसगढ़ प्रभारी पीएल पुनिया ह कांग्रेस प्रदेश अध्यक्ष के चयन ला  लेके पूछेगे सवाल म  कुछु घलो स्पष्ट तउर पर कहे म इंकार कर दिस, उहें  मंत्री टीएस सिंह के बयान ल घलो सिरा ले खारिज कर दीन।  उमन कहिन के , ‘निरनय ले के अधिकार सिरिफ राष्ट्रीय अध्यक्ष के तीर हे, न कि मोर या कोनो अन्य मंत्री के तीर’।

बता दन के  मंत्री टीएस सिंह देव ह कहे रहिस हे के,  ‘लोकसभा चुनाव तक मुख्यमंत्री भूपेश बघेल ह प्रदेश अध्यक्ष के तउर म रहही’।  ए बयान म पीएल पुनिया ह साफ कहिन हे के, ‘प्रदेस अध्यक्ष के नाम म अंतिम फइसला राहुल गांधी ही लेहीं’

 उहें सवरन मन ल  मिलइया 10 प्रतिसत आरक्षन ल छत्तीसगढ़ म लागू होए के प्रक्रिया  म पीएल पुनिया  ह कहिन के , ‘कानून बन गेहे त  एला छत्तीसगढ़ म घलो लागू कर देय जाही।’

बैलट पेपर ले मतदान

लोकसभा चुनाव म इवीएम ले होवइया मतदान म कांग्रेस के राज्यसभा सांसद ह कहिन के , ‘राष्ट्रीय अधिवेसन म बैलट पेपर ले मतदान के प्रस्ताव इलेक्शन कमीसन के समक्ष रखे गेहे।  अब फइसला के इंतजार  हवय।’