छत्तीसगढ़ राज्य युवा महोत्सव 2024-25, छत्तीसगढ़ विकास प्रदर्शनी बनिस आकर्षण के केन्द्र

रायपुर। राजधानी रायपुर के साइंस कॉलेज मैदान म चलत छत्तीसगढ़ राज्य युवा महोत्सव म जनसपंर्क विभाग सहित विभिन्न विभाग के लगाए गे विकास प्रदर्शनी ह लोगन के बीच आकर्षण के केन्द्र बनत हे। ए विकास प्रदर्शनी म पिछला एक बछर म छत्तीसगढ़ म होए विकास कार्य के मॉडल अउ छायाचित्र के माध्यम ले प्रदर्शित करे गे हे, एखर अलावा शिल्प ग्राम घलो बनाए गे हे। 

जनसंपर्क विभाग द्वारा लगाए गे प्रदर्शनी म युवा मन ल प्रतियोगी परीक्षा मन के मद्देनजर क्विज प्रतियोगिता के घलो आयोजन करे जात हे। ए क्विज प्रतियोगिता म युवा उत्साह ले हिस्सा लेवत हें। क्विज प्रतियोगिता म शासकीय योजना ले संबंधित प्रश्न पूछे जात हें। क्विज के सही जवाब देवइया युवा मन ल उपहार घलो देय जात हें। क्विज प्रतियोगिता म भाग लेवइया युवा मन ल मुख्यमंत्री ले सीधे जुड़े बर डिजिटल प्लेटफॉर्म के उपयोग करके बार कोड ल स्कैन करके जुड़े बर जागरूक करे जात हे, ए लिंक म मुख्यमंत्री के ट्यूटर, फेसबुक, इंस्टाग्राम, वेबसाइट, यूट्यूब ले जुड़के राज्य शासन के प्रतिदिन होवइया आयोजन, कार्यक्रम, योजना के सटीक अउ सही जानकारी तत्काल प्राप्त हो सकहि। ए प्रयास के युवा तारीफ घलो करत हे। 

साइंस कॉलेज मैदान म बनाए गे छत्तीसगढ़ शिल्पग्राम म विभिन्न प्रकार के हस्तशिल्प कोसा, खादी आदि के स्टॉल लगाए गे हें। छत्तीसगढ़ माटी कला बोर्ड, छत्तीसगढ़ खादी अउ ग्रामोउद्योग, के संग ही हस्तशिल्प, बांस शिल्प, मिलेट, हर्बल उत्पाद के स्टॉल लगाए गे हे। एखर अलावा खेल अउ युवा कल्याण रोजगार अउ प्रशिक्षण, कृषि अउ जैव प्रौद्योगिकी, वाणिज्य अउ उद्योग, स्कूल अउ उच्च शिक्षा, पर्यटन, नगरीय प्रशासन, कौशल विकास अउ ग्रामीण स्वरोजगार प्रशिक्षण विभाग के प्रदर्शनी लगाए गिस।