छत्तीसगढ़ी सिनेमा जगत के प्रतिष्ठित स्मार्ट सिनेमा अवॉर्ड समारोह 30 अगस्त के, 34 कैटेगरी म दे जाही अवॉर्ड

रायपुर। छत्तीसगढ़ी सिनेमा जगत के प्रतिष्ठित स्मार्ट सिनेमा अवॉर्ड समारोह 2019 के आयोजन 30 अगस्त के करे गिन हे। समारोह ह मंझनिया दू बजे ले नवा रायपुर के श्री सत्य सांई अस्पताल परिसर के सौभाग्यम सभागार म होही। एमा साल 2018 म रिलीज होय एक दर्जन छत्तीसगढ़ी फिलिम के बीच 34 आने-आने कैटेगरी म स्मार्ट सिनेमा अवॉर्ड-2019 प्रदान करे जाही। 

आयोजन समिति के प्रमुख पीएलएन लकी ह बतईन कि समारोह के तियारी ल अंतिम रूपरेखा दें बर आयोजक मन जुटे हे। उंहे अवॉर्ड समारोह म विशेष प्रस्तुति देवईया नृत्य समूह अउ कलाकार मन अपन तियारी घलो करत हे।

समारोह म साल 2018 म प्रदर्सित होय एक दर्जन फिलिम मन के बीच 34 कैटेगरी म अवॉर्ड दे जाही। जम्मो फिलिम ल ज्यूरी सदस्य मन ह फिलिम के टीम के संग बईठ के देखिन हे, तेकर बाद निर्णय ल अपन पास सुरक्षित रखे हे, जेकर परिनाम ल समारोह म संझाकन घोषित करही। ये साल कार्यक्रम के मुख्य अतिथि संस्कृति मंत्री अमरजीत भगत हे, जेकर उपस्थित म अवॉर्ड प्रदान करे जाही।

अवॉर्ड समारोह ल बेहतर बनाए बर दीपक श्रीवास्तव रेजर इवेंट के टीम के संग हे। संगे-संग स्मार्ट सिनेमा अवॉर्ड के एसोसिएट स्पॉन्सर हे ब्लू लाइन टीएमटी एंड पाइप्स, वैल्यूएबल स्पॉन्सर एवीएम ऑडियो अउ वीडियो स्टूडियो, यूट्यूब चैनल स्मार्ट सिनेमा न्यूज़, डिजिटल मीडिया पार्टनर जय जोहार डॉट कॉम, फेसबुक ऑनलाइन पार्टनर क्रिएटिव विजन, फोटो अउ वीडियो पार्टनर मंडल ग्रॉफिक्स हे।

ये फिलिम हे शामिल

फैमिली नंबर वन, प्रेम अमर है, सुंदर मोर छत्तीसगढ़, आई लव यू, दबंग दरोगा, मोर जोड़ीदार, बंधन प्रीत के, प्रेम के बंधना, सोल्जर छत्तीसगढ़िया, राधे अंगूठा छाप, पढ़ई म जीरो तभो ले हीरो, भाई बहन एक अटूट बंधन