रायपुर म तियार होईस गाड़ी मन बर छत्तीसगढ़ के पहिली फिटनेस टेस्टिंग सेंटर, आधुनिक मशीन ले होही जांच

मुख्यमंत्री भूपेश बघेल के निर्देश ले वाहन मन के फिटनेस जांच बर रायपुर म छत्तीसगढ़ के पहिली ऑटोमेटिक फिटनेस टेस्टिंग सेंटर तियार हो गे हे। ए सेंटर म नवा-नवा आधुनिक मशीन ले वाहन मन के फिटनेस जांच करे जाही। सड़क दुर्घटना कम करे के दिसा म एला बड़का फईसला माने जात हे। उहें ए दिसा म परिवहन विभाग कोती ले होवत उदिम म ए ह एक बड़का सफलता आए।

मुख्यमंत्री के मंशा के अनुरूप परिवहन विभाग कोती ले बेवस्था मन के आधुनिकीकरण के दिसा म सरलगहा परयास होवत हे। परिवहन विभाग ले जुड़े किसम-किसम के सेवा ल ऑनलाईन करे गे हे। ड्राइविंग लाइसेंस अऊ रजिस्ट्रेशन प्रमाण-पत्र ल घर पहुंचा के दे जावत हे। ए दिसा म एक रेंगना अऊ बढ़ात ट्रांसपोर्ट विभाग ह वाहन मन के फिटनेस निरीक्षण के बुता ल घलो अब ऑटोमैटिक करत हे। ए संबंध म सचिव परिवहन एस. प्रकाश ह बताईन कि अब फिटनेस निरीक्षण के बुता मानव रहित हो सकत हे काबर कि एला अब स्वचालित मशीन ले करे जाही।

आयुक्त परिवहन दीपांशु काबरा ह बताईन कि ऑटोमेटेड फिटनेस सेंटर म मशीन कोती ले रोलर ब्रेक टेस्ट, एक्सल भार टेस्ट, सस्पेंशन टेस्ट, साइड स्लिप टेस्ट, जॉइंट प्ले टेस्ट, स्टीयरिंग गियर प्ले टेस्ट, स्पीडो मीटर टेस्ट, स्पीड गवर्नर टेस्ट, एग्जॉस्ट गैस टेस्ट, हेड लाइट टेस्ट करे जाही।

बेरा-बेरा म निरीक्षण जरूरी

ट्रांसपोर्ट वाहन ल 08 बछर होए के पहिली 02 बछर म फिटनेस प्रमाण के निरीक्षण कराए ल होथे। 08 बछर ले जादा के ट्रांसपोर्ट वाहन ल हर बछर फिटनेस निरीक्षण कराए ल होथे। ए नियम यात्री अऊ माल यान दूनों बर होथे। जेन ह यात्री या फेर माल ले जाए बर कमर्शियल वाहन के रूप म उपयोग म आथे।

पहिली ए होवत रिहिस

पहिली फिटनेस के निरीक्षण के बुता आरटीओ ऑफिस म इंस्पेक्टर ह करत रिहिस। इंस्पेक्टर कोती ले अनुभव के आधार म विजुवल इंस्पेक्शन करे के बाद फिटनेस प्रमाण-पत्र जारी कर दे जात रिहिस। कई बार अइसे परिस्थिति म वाहन-मालिक ह ए बात ले संतुष्ट नई हो पात रिहिस। जेन वाहन फिट नई हे ओ ह यदि रोड म चलथे त एक्सीडेंट के आशंका बने रहिथे। ट्रांसपोर्ट वाहन ले एक्सीडेंट होए ले जान-माल के हानि जादा होथे। इही सब बात ल धियान म रखत हैवी गाड़ी मन के फिटनेस 01 अप्रैल 2024 ले ऑटोमैटिक फिटनेस सेंटर ले अनिवार्य कराए के अधिसूचना जारी करे गे हे।

स्क्रैप नीति म 25 प्रतिशत के छूट

राज्य म ऑटोमोबाइल सेक्टर ल गति दे बर स्क्रैपिंग नीति घलो लाए गे हे। जेखर ले जुन्ना गाड़ी के स्क्रैपिंग कराए ले नवा गाड़ी खरीदे बर टैक्स म 25 प्रतिशत छूट के प्रावधान करे गे हे। ए छूट के लाभ ले के पहिली गाड़ी ल ऑटोमैटिक फिटनेस सेंटर ले निरीक्षण कराए के बाद रजिस्टर्ड व्हीकल स्क्रैपिंग सेंटर म स्क्रैपिंग कराए बर पड़ही। स्क्रैपिंग कराए के बाद नवा गाड़ी खरीदे बर टैक्स म छूट बर सर्टिफिकेट ऑफ़ डिपाजिट दे जाही। इही नियम के पालन कर के छूट दे जाही। एखर अतिरिक्त यदि 15 बछर ले जादा के ट्रांसपोर्ट गाड़ी ऑटोमेटेड फ़िटनेस सेंटर के फ़िटनेस परीक्षण म फेल हो जाही त अईसे गाड़ी के पंजीयन ल निरस्त कर दे जाही।