बस्तर म भरोसा के रद्दा ले बोहावत हे विकास के बयार, 16 हजार करोड़ ले चमचमावत हे इहां के सड़क

बदलाव के नवा रद्दा खोलत हे छत्तीसगढ़ के सड़क, 7 हजार 406 बुता मन ले बदल के तस्वीर

कभू लाल आतंक के कहारत बस्तर म अब विकास के बयार बोहावत हे। ग्रामीण इलाक मन म चमचावत सड़क, पुल-पुलिया बनाए के नवा नवा उदिम होवत हे। उहां के रहवईया मनखे मन ल एखर ले सुविधा मिलत हे। सरकार विकास ले बदलाव के नवा रद्दा ल खोल दे हे। 16 हजार 670 करोड़ रुपिया के राशि ले उहां रोड ह चमचमावत हे। इलाका म 7 हजार 406 बुता मन के होए ले इहां के तस्वीर ह बदल गे हे। बस्तर संभाग के सुकमा, बीजापुर, नारायणपुर, दंतेवाड़ा, बस्तर जईसे दुर्गम क्षेत्र म ए बदलाव ह देखे बर मिलत हे। गांव-गांव म सड़क पहुंच गे हे। भूपेश सरकार के योजना ले लोगन मन के परेसानी ह सिरावत हे।

विकास के खुलगे नवा रद्दा

मुख्यमंत्री भूपेश बघेल ह छत्तीसगढ़ के जम्मो जिला म विश्वास अऊ विकास के जेन रोडमैप तियार करे गे हे ओ ह अब आकार लेवत हे। छत्तीसगढ़ के सड़क मन ह इहां के लाइफ लाइन आए अऊ जेन ह अवईया बेरा म विकास के नवा रद्दा खोलही। एखर ले व्यापार बाढही, पर्यटन अऊ ऐतिहासिक स्थल के विकसित होए के संगे-संग आर्थिक रूप ले छत्तीसगढ़ के भीतरी इलाका घलो समृद्धि कोती सरपट भागही। ए सब कुछ संभव होही सड़क के ओ कारिडोर ले जेन ल बढ़ाए के बुता तेजी ले करे जात हे।

16 हजार 670 करोड़ रुपिया के स्वीकृति

राज्य म पाछू के साढ़े चार बछर म अलग-अलग योजना म सड़क अऊ पुल के 7406 बुता बर लगभग 16 हजार 670 करोड़ रुपिया के स्वीकृति दे गे हे। ए बेरा म भवन मन के 419 बुता बर लगभग 908 करोड़ रुपिया के स्वीकृति मिले हे। पाछू के चार बछर म राज्य मद ले 9884 किलोमीटर के सड़क मन ल उन्नयन करे जा चुके हे।

4 हजार 41 किलोमीटर सड़क मन के नवा डामरीकरण

एमे ले 4 हजार 41 किलोमीटर सड़क के नवा डामरीकरण, 3 हजार 244 किलोमीटर सड़क मन के डामरीकृत नवीनीकरण, 1 हजार 113 किलोमीटर सड़क मन के चौडीकरण, 588 किलोमीटर सड़क मन के मजबूतीकरण अऊ 898 किलोमीटर सड़क मन के सीमेंट कांक्रीटीकरण करे गे हे।

भीतरी के इलाका मन बर बुनियादी सुविधा

मुख्यमंत्री भूपेश बघेल ह कहे रिहिन कि विश्वास, विकास अऊ सुरक्षा ह सरकार के मूलमंत्र आए। मुख्यमंत्री कहिथे हमर छत्तीसगढ़ के भीतरी इलाका म बुनियादी सुविधा ल पहुंचाना सबले जरूरी हे। सरकार के लक्ष्य ग्रामीण मन तक राशन, शिक्षा, स्वास्थ्य, संचार माध्यम, रोजमर्रा के जिनिस, रोजगार अऊ आजीविका के साधन उपलब्ध कराना हे, जेखर बर सड़क ह एक महत्वपूर्ण साधन आए.

मुख्यधारा म संघरत हे बस्तर के भीतरी इलाका

बस्तर संभाग के सुकमा, बीजापुर, नारायणपुर, दंतेवाड़ा, बस्तर जईसे जिला के दुर्गम इलाका अब धीरे-धीरे मुख्यधारा म संघरत हे। सड़कों के निर्माण अऊ मरम्मत होए ले किसान मन के पंजीयन घलो बाढ़े हे। ए क्षेत्र म धान के बिक्री घलो बाढ़त हे। वनोपज संग्रहण अऊ बिक्रय के बुता म तेजी आए हे, एखर ले छत्तीसगढ़ म रोजगार के साधन घलो उपलब्ध होए हे।