फेर ए मुकाम म आए के पीछे हे कई कहानी, त जानव जीरो ले लेके 4 लाख सब्सक्राईबर तक के कहानी
जय जोहार. जेन बेरा म YouTube चैनल म हमर भाखा यानि छत्तीसगढ़ी के नाममात्र के कंटेंट हमर भाखा म मिलत रिहिस.. तेन बेरा म हमर माटी के एक लईका आनंद दास मानिकपुरी (Anand Das Manikpuri) ह इंजीनियर के नौकरी ल छोड़के यू ट्यूब म छत्तीसगढ़ महतारी के सेवा बर कूदिस। अऊ आज जेन कुर्बानी ओ बेरा म दे रिहिस ओ सफल होत दिखत हे। ओकर चैनल आज सबले चहेता चैनल बनगे अऊ ओखर सबस्क्राईबर 4 लाख पार हो गे हे। फेर ए सफर अतेक आसान नई रिहिस.. त चलव हमन बतात हन ए रद्दा के चुनउती…
यहू ल पढ़व….. जेखर लोकगीत ल सुनके, चारों मुड़ा बगर जाथे माटी के खुशबु
हमर भाखा छत्तीसगढ़ी के कॉमेडी चैनल द एडीएम शो.. ए नाव ले हर मनखे परिचित होही जेन YouTube म विडियो देखथे। YouTube देखईया मन ए बात के इंतजार करत रहिथे कि एडीएम के नवा बिडियो कब आवत हे। इही नहीं छत्तीसगढ़ नई ओडिशा, झारखंड, बिहार, उत्तर प्रदेश, असम अऊ महाराष्ट्र जईसे दूसर भाषी प्रदेश म भी एडीएम शो देखे जाथे।
अपन भाखा के अलख जगाए बर बईहा
कहे जाथे कि अंतस म कोनो बूता करे के जज्बा रहिथे त कोनों भी काम कठिन नई रह जाए। इही बात आनंद मानिकपुरी के जिनगी म जुड़ गे हे। छत्तीसगढ़ी भाखा ल लेके ओखर अंतस म जेन जूनून रिहिस आज ओखरे बदौलत आनंद ह ए मुकाम ल पाए हे। 6 साल सरकारी प्रोजेक्ट म इंजीनियर के काम करईया आनंद बर तब के बेरा म नौकरी छोड़े के फईसला ह आसान नई रिहिस फेर एक बार ठान लिस त कभू पाछू मुड़ के नई देखिस।
यहू ल पढ़व….. फिल्म गाइड के मार्को की आत्मकथा, ओल्ड बॉलीवुड में छत्तीसगढ़ के माटीपुत्र की गौरव गाथा
मैकेनिकल इंजीनियर कईसे बनगे YouTuber
बिलासपुर के मंगला म रहवईया आनंद मानिकपुरी ह चौकसे इंजीनियरिंग कॉलेज ले मैकेनिकल इंजीनियर के डिग्री ले हे। पढई के बाद रायपुर म रहिके ओ ह 6 साल तक सरकारी प्रोजेक्ट म बुता करिस। बचपन ले छत्तीसगढ़ी भाखा अऊ फिलिम ले लगाव रिहिस जेखर सती अपन बुता ले ज्यादा सउख उपर भरोसा करिस। ताहन नौकरी ल छोड़के लग गे ए बूता म..
यहू ल पढ़व….. मोक्षदा कईसे बनिस पद्मश्री ममता चन्द्राकर, देखव पहिली बार बिसेस इंटरव्यू
2017 ले अब तक 4 लाख सब्सक्राईबर
आनंद ह साल 2017 म YouTube चैनल ल बनाईस जेखर बाद ओमा बिडियो डालना शूरू कर दिस। शुरू म कंटेट ल लेके थोड़ा बहुत दिक्कत आत रहिस अऊ जनता के बीच जाके हल्का पुल्का छत्तीसगढ़ी मुहावरा व जनउला के बिडियो बनाके डालत रिहिस। जेन ल लोगन मन खूब पसंद करिस अऊ इही उम्मीद ह आनंद के दिल म घर कर लिस कि अब YouTube म ही कुछु नवा करे जाए। आज आनंद के चैनल म 4 लाख ले ज्यादा सब्सक्राईबर हे अऊ 120 बिडियो बना डरे हे। अऊ आज के बेरा म आनंद के टीम ल YouTube के छत्तीसगढ़ी कॉमेडी के किंग कहे जाथे। 2 करोड़ ले ज्यादा व्यू ओकर चैनल म आ गे हे।
यहू ल पढ़व….. का आप मन जानथो मो. रफी साहब ह कतेक रुपिया म गाए रिहिस पहिली छत्तीसगढ़ी गाना, देखव जोहार पहुना मनु नायक संग
कईसे मिलिस प्रेरणा
आनंद ह बताथे कि YouTube म आशीष चंचलानी अऊ अमित भड़ाना जईसे बड़का YouTuber मन के बिडियो ल ओहा अक्सर देखे। इही मेरा ले ओला आइडिया आईस कि काबर हमन भी अपन भाखा के कोनों चैनल बनाके काम नई कर सकन। बता देन कि आनंद मानिकपुरी ह खुदे एडिटिंग करथे अऊ स्क्रीप्ट ल घलो खुदे ह लिखथे। कैमरा ओखर भाई तुषार मानिकपुरी ह चलाथे। तुषार घलो पेसा ले इंजीनियर हरे।
यहू ल पढ़व….. छॉलीवुड के कॉमेडी किंग हेमलाल कौशल.. जोहार पहुना म
अपन भाखा के दशा देख होत रिहिस उदास
आनंद कहिथे कि ओला अपन भाखा छत्तीसगढ़ी के प्रति गहरा लगाव हे। अऊ लोगन मन के बीच में हमर भाखा के प्रचार-अऊ जागरूकता लाए बर ए फील्ड आए के ओ ह सोचिस। काबर कि एक दौर रिहस जब छत्तीगढ़िया मन छत्तीसगढ़ी बोले म हिचकिचाए.. एखरे सती मन उदास रहय फेर अब बेरा बदल गे हे अऊ आज हमर भाखा म गोठियाए बर कोनों शरम नई करे। एखर पीछे सोशल मीडिया घलो एक वजह हे। आनंद के सपना हे कि विश्वपटल म हमर भाखा अऊ हमर प्रदेश ल ले जाए के सपना हे। जेमा छॉलीवुड, बॉलीवुड अऊ वेब सीरिज सामिल हे।
