दीपक बावनकर@रायपुर. डांस अउ अभिनय म अपन कैरियर बर संघर्ष करत शहर के ज्योति ल आज कोनो बड़े बैनर और अच्छा निर्देशक संग काम करे के तमन्ना हे। ज्योति के पूरा नाम ज्योति वैष्णव आए , अईसे तो ये क्षेत्र म बड़ अकन काम करे ज्योति के प्रतिभा बने ढंग से प्रस्तुत नई हो पाए हे, काबर कि अब तक वो ह कम बजट वाले प्रोजेक्ट मन म काम करे हे। बने अभिनय अउ डांस के संगे संग गायकी म घलोक पैठ रखते ज्योति ह।
अभी तक सैकड़ों एल्बम म एक्टिंग कर चुके ज्योति ल फिलिम मन म कम काम मिले हे बने डायरेक्टर संग अगर वो ह अभिनय करही तो ओखर प्रतिभा दर्शक मन तक जरूर पहुंचही, काबर की ज्योति के कई ठन फिलिम मन अभी तक प्रदर्शित नई होय हे। ज्योति ह अंधियार , दहाड़ , लफंटूस म मुख्य अभिनेत्री के रोल करे हे अउ राजू दिलवाला, टूरा चायवाला म कैरेक्टर रोल करे हे। ज्योति ह 2015 म डांस इंडिया डांस म लेवल 3 तक घलोक जा चुके हे। ज्योति के इच्छा हे कि वो ह अईसे फिलिम म काम करे जेमा ओला मारधाड़ करे बर मिले।
अभी ज्योति ह यू ट्यूब चैनल बर गाना मन के शूटिंग में व्यस्त हे वो ह रोज एक गाना के शूटिंग करत हे । छोटे छोटे रोल म खुश रहीके ज्योति आज बने काम करथ हे, लेकिन बड़े बैनर के फिल्म के अगोरा म हावे ज्योति ह।
