CM Bhupesh Baghel ह करीन नगरीय निकाय म विकास काम बर एक हजार करोड़ रुपिया दे के घोसना

जय जोहार। सीएम भूपेश बघेल (CM Bhupesh Baghel) ह बुधवार के राज्य के नागरिक ल एक हजार करोड़ रुपिया के विकास काम के सौगात दीन । मुख्यमंत्री ह नगरीय प्रसासन अउ विकास विभाग के गौरव समागम-2023 म सामिल होत हुए किहीन कि हमर सरकार म नागरिक ल घर बइठे ही सुविधा मिलत हे । एखर संग साथ सबो नगरीय निकाय ह नागरिक सुविधा ल बेहतरकरे हे। वोहा किहीन कि हमर सरकार ह रासनकार्ड बनाय म सुधार करे हे । आज सबो के रासनकार्ड आसानी ले बन जात हे ।

सीएम भूपेश बघेल ह बड़का घोसना करत हुए किहीन कि युवा ल रोजगार बर रायपुर अउ भिलाई म सॉफ्टवेयर अउ हार्डवेयर सुविधा समेत बीपीओ खोले जाही । छात्र-छात्रा ल बेहतर सिक्षा बर भिलाई म 20 करोड़ की लागत ले विश्वस्तरीय सेंट्रल लाइब्रेरी कम रीडिंग ज़ोन बनाए जाही । मुख्यमंत्री ह रीपा के तर्ज म सबो नगर निगम अउ नगर पालिका म अर्बन कॉटेज अउ सर्विस इंडस्ट्रीज पार्क खोले के घोसना करीन ।

सियाम भूपेश बघेल ह सबो नगरीय निकाय ल विकास काम बर लगभग 1 हजार करोड़ रुपिया के रासि दे के घोसना करीन। वोहा नगर निगम रायपुर ल 100 करोड़, बिलासपुर नगर निगम ल 50 करोड़, दुर्ग नगर निगम ल 25 करोड़, भिलाई-चरौदा, अम्बिकापुर, जगदलपुर ल 20-20 करोड़, रिसाली, राजनांदगांव, रायगढ़ अउ कोरबा ल 15-15 करोड़, बिरगांव, धमतरी अउ चिरमिरी ल 10-10 करोड़ के रासि दे के घोसना करीन । एखर संग ही सबो नगर पालिका ल 5-5 करोड़ अउ सबो नगर पंचायत ल 3-3 करोड़ रुपिया के रासि दे के घोसना करीन।