जय जोहार…. (Raipur) मुख्यमंत्री भूपेश बघेल ह प्रदेस वासी मन ल छत्तीसगढ़ के प्रसिद्ध लोक तिहार छेरछेरा के बधाई अउ सुभकामना दीन हे। ए अवसर म सीएम श्री बघेल ह सबो झन के सुख, समृद्धि अउ खुसहाली के कामना करे हे।
सीएम श्री बघेल ह छेरछेरा तिहार के पूर्व संझा म जारी अपन सुभकामना संदेस म किहीन हे क़ि नवा फसल के घर आय के खुसी म पौष मास के पूर्णिमा के छेरछेरा पुन्नी तिहार मनाये जात हे। इहीं दिन मां शाकम्भरी जयंती घलो मनाये जात हे। (Raipur) पौराणिक मान्यता के अनुसार ए दिन भगवान शंकर ह माता अन्नपूर्णा ले भिक्षा मांगे रिहीस, एखर सेती मनखे मन ह धान के संग साग-भाजी, फल के दान घलो करत हे।
मुख्यमंत्री श्री बघेल ह किहीन कि महादान अउ फसल उत्सव के रूप तिहार मनाये जवइया छेरछेरा तिहार हमर मन के समाजिक समरसता, समृद्ध दानसीलता की गौरवसाली परम्परा के संवाहक हे। (Raipur) ए दिन ‘छेरछेरा, कोठी के धान ल हेरहेरा‘ बोलते हुये गांव के लईका , युवा अउ महिला मन ह खलिहान अउ घर म जाके धान अउ भेंट स्वरूप प्राप्त पैसा इकट्ठा करत हे अउ ए धान अउ रासि ले बच्छर भर बर कारीकरम बनात हे।
मुख्यमंत्री श्री बघेल ह किहीन कि प्रदेस के अमूल्य धरोहर अउ पौराणिक परम्परा के संवर्धन अउ संवहन हो सके, एखर सेती छत्तीसगढ़ सरकार ह छेरछेरा तिहार म सार्वजनिक छुट्टी घलो घोसित करे हे। वो हा किहीन कि हमर मन के समृद्ध सभ्यता अउ परंपरा ले भावी पीढ़ी ल परिचय कराना हमन सबो झन के दायित्व हे ।
