chhattisgarh : पंचायत अउ ग्रामीण विकास मंत्री टीएस सिंहदेव ह करीन ई-पंचायत वेब पोर्टल के सुभारंभ

जय जोहार …. (chhattisgarh) पंचायत अउ ग्रामीण विकास मंत्री टी.एस. सिंहदेव ह आज पंचायत विभाग डहार ले तैयार करे गये ई-पंचायत छत्तीसगढ़ वेब पोर्टल के सुभारंभ करीन। ये पोर्टल ल प्रमुख रूप ले चार मॉड्यूल म काम करे बर बनाये गेहे। पोर्टल के सुभारंभ मउका म मंत्री श्री सिंहदेव ह वेब पोर्टल के तकनीकी पहलू के जानकारी लीन। संगेसंग पोर्टल म कुछु नवा जानकारी ल जोड़े ल लेके कई आवश्यक सुझाव घलो देहे।

ए अवसर म पंचायत अउ ग्रामीण विकास मंत्री श्री सिंहदेव ह किहीन कि ई-पंचायत छत्तीसगढ़ वेब पोर्टल निश्चित रूप ले प्रदेस ल ई-गवर्नेंस के क्षेत्र म डिजिटली ससक्त बनाय म कारगर साबित होही। वो हा किहीन कि एखर ले प्रदेस राजनैतिक-सामाजिक ससक्तीकरण के दिसा म आगू बाढ़ही। संगेसंग पंचायती राज के उद्देश्य ल घलो प्राप्त करे म मदद मिलही।

मंत्री श्री सिंहदेव ह ए पहल बर विभागीय अधिकारी समेत सबो स्टेक होल्डर्स अउ प्रदेस वासी मन ल बधाई अउ सुभकामना दीन। (chhattisgarh) ए अवसर म पंचायत अउ ग्रामीण विकास विभाग के आयुक्त अविनाश चंपावत, विभागीय सचिव आर. प्रसन्ना, विशेष सचिव अउ मनरेगा के आयुक्त मोहम्मद कैसर अब्दुलहक घलो मौजूद रिहीन ।