रायपुर। मुख्यमंत्री भूपेस बघेल के कहना हे कि राज सरकार हा भगवान किसन -कन्हैया के बताए रस्ता म चलत गाय-गरू के सेवा करे बर सुराजी ग्राम योजना ले गांव मन म गौठान बनावत हे। गौठान म मवेसी मन बर चारा, पानी अउ सुरक्षा के इंतजाम करे जाही। गौठान के देखरेख बर गौठान समिति बनाए जावत हे।
बघेल जी हा किहिन कि हमर सरकार हा भगवान किसन-कन्हैया के वंसज मन के घलो सुध ले हे। हर गौठान समिति ला हर महीना 10 हजार रुपया दिए जाही। मुख्यमंत्री श्री बघेल हा पद्मश्री गोविंदराम निर्मलकर ऑडिटोरियम म कोसरिया समाज राजनांदगांव द्वारा आयोजित ‘श्री कृष्ण जन्माष्टमी महोत्सव’ ला संबोधित करत रिहिन हे। ये मौका म वाणिज्य अउ उद्योग मंत्री श्री कवासी लकमा बिसेस रूप ले मौजूद रिहिन।
मुख्यमंत्री श्री बघेल हा किहिन – गोठान मन म जउन गोबर सकलाही, ओकर ले वर्मी खाद अउ कम्पोस्ट बनाए जाही। एकर ले जैविक खेती ला बढ़ावा मिलही। मुख्यमंत्री हा यादव समाज सहित सबो जनता ला आठे तिहार के बधाई देवत किहिन – भगवान श्री किसन-कन्हैया हा गीता म कर्म, भक्ति अउ ज्ञान योग के सीख दे हे। ये सीख पूरा मानव समाज के भलाई बर हे। गीता के उपदेस मानव जीवन म कठिन ले कठिन परिस्थिति ले बाहिर निकले म काम आथे।
मुख्यमंत्री श्री बघेल हा किहिन – रास्ट्रपिता महात्मा गांधी हा गौमाता ला माँ ले भी बढ़के बताए हें। ये महात्मा गांधी के गौमाता के प्रति एक भाव ए। गौमाता हर इंसान ला दूध पियाथे। मुख्यमंत्री हा किहिन कि मानव के भलाई बर पसुधन के संरक्षण अउ संर्वधन जरूरी हे।
Other Articles
दंतेवाड़ा म 8 लाख के इनामी नक्सली डिप्टी कमांडर ह करिस आत्मसमर्पण
अबूझमाड़ म नक्सल मुठभेड़ म घायल होय रिहिस एक जवान शहीद
