मुख्यमंत्री भूपेश बघेल ह केन्द्रीय विद्युत मंत्री ल लिखिन पत्र, करिन ये आग्रह

जय जोहार…. मुख्यमंत्री भूपेश बघेल ह केन्द्र सरकार के तरफ ले प्रस्तावित विद्युत संशोधन बिल 2020 ल समाज के गरीब तबका अऊ किसान मन बर अहितकारी बताय हे। ए संबंध म केन्द्रीय विद्युत राज्यमंत्री (स्वतंत्र प्रभार) आरके सिंह ल पत्र लिखे हे। मुख्यमंत्री बघेल ह ए पत्र म भारत के वर्तमान स्थिति ल देखत हुये ए संशोधन बिल ल स्थगित रखे के आग्रह करे हे।

पत्र म केहे गे हे कि ए संशोधन बिल म क्रास सब्सिडी के प्रावधान ह किसान अऊ गरीब मन के हित म नई हे। समाज के गरीब तबके के लोग अऊ किसान मन ल विद्युत सब्सिडी दे जाय के वर्तमान प्रावधान ह जांचा, परखा अऊ समय के जरूरत के अनुरूप हे। किसान मन ल विद्युत म दे जवइया सब्सिडी यदि जारी नई रखे गिस, त किसान मन के समक्ष फसल के सिंचाई ल लेके संकट ह खड़े हो जाही। एखर ले खाद्यान्न उत्पादन ह प्रभावित होही अऊ देश के समक्ष संकट खड़े हो जाही।

मुख्यमंत्री ह कहिन कि किसान अऊ मजदूर मन के मेहनत के सम्मान होना चाही। जे मन ह अपन मेहनत ले देश ल खाद्यान्न मामले म आत्मनिर्भर बनाय हे। समाज के गरीब वर्ग के लोग अऊ किसान मन ल आत्मनिर्भर अऊ सक्षम बनाय बर ओ मन ल रियायत दे जाना जरूरी हे। सीएम बघेल ह संशोधित बिल म क्रास सब्सिडी ल सीमित करे जाय के प्रावधान ल अव्यवहारिक बताय हे।