प्रियंका गांधी के धरना समाप्त, मुख्यमंत्री भूपेश बघेल के सोनभद्र जाना घलो होगे रद्द

रायपुर। मुख्यमंत्री श्री भूपेश बघेल हा आज शनिवार कांग्रेस महासचिव प्रियंका गांधी के धरना ला समर्थन दे बर उत्तरप्रदेश जवइया रिहिस हें, लेकिन प्रियंका गांधी के धरना समाप्त होए के कारण मुख्यमंत्री के उहां जाना भी रद्द होगे।

कांग्रेस महासचिव प्रियंका गांधी हा सोनभद्र म होय हत्याकांड ले प्रभावित पीड़ित लोगन से मिले बर शुक्रवार के जावत रिहिन। जिहां उत्तर प्रदेश प्रशासन हा ओमन ला मृतक मन के परिवार ले मिले ले रोक दिस. अइसे म प्रियंका गांधी हा मिर्जापुर म ही धरना के ऐलान कर दे रिहिन।

प्रियंका गांधी हा किहिन कि ओमन तब तक धरना म बइठे रहीं, जब तक ओमन ला सोनभद्र फायरिंग केस के पीड़ित मन ले नई मिलन दिए जाही। एकर बाद छत्तीसगढ़ के मुख्यमंत्री भूपेश बघेल हा घलो अपन सबो कार्यक्रम रद्द कर दे रिहिन अउ प्रियंका गांधी के धरना के समर्थन करे बर रायपुर ले वाराणसी रवाना होवइया रिहिन। लेकिन अब उंकर ये दौरा रद्द हो गे हे।

दौरा रद्द होए के पाछू ये कारण आय कि जेन धरना के समर्थन करे बर श्री बघेल हा जवइया रिहिन, वो धरना अब समाप्त हो चुके हे। सोनभद्र गोलीबारी म मारे गे लोगन के परिजन मन संग शनिवार के प्रियंका गांधी हा मुलाकात करिन हें।

प्रशासन हा पीड़ित परिवार ले प्रियंका गांधी के मुलाकात करवाईस. पीड़ित मन के परिवार के लोगन प्रियंका गांधी ले मिले बर गेस्ट हाउस के बाहर तक पहुंचे रिहिन, त ओमन ला गेट के बाहिर ही रोक दे गे रिहिस हे।

जब प्रियंका गांधी हा खुद मिले बर जाय लगिन त पुलिस हा रोक दिस। एकर बाद पीड़ित मन के परिजन मन ला अंदर बलाए गिस।