जय जोहार । मुख्यमंत्री दाई-दीदी मोबाइल क्लीनिक (Chief Minister Dai-Didi Clinic) के माध्यम ले अब तक प्रदेस म करीबन 1812 कैम्प लगाए गेहे । एमा रायपुर, बिलासपुर अउ भिलाई नगर निगम क्षेत्र के स्लम बस्ती म रहवइया 1 लाख 35 हजार 722 महिला अउ लईका मन के ओखर घर के तीर ही दाई-क्लीनिक कैंप के माध्यम ले इलाज करे गेहे।
गौरतलब हे कि छत्तीसगढ़ सासन के नगरीय प्रसासन अउ विकास विभाग डहार ले मुख्यमंत्री दाई-दीदी क्लिनिक योजना संचालित हे । ए योजना के तहत दाई-दीदी क्लिनिक के मोबाइल मेडिकल यूनिट के वाहन म महिला चिकित्सक अउ महिला स्टॉफ के टीम पहुंचत हे। उहे जरूरतमंद महिला अउ लईका मन के बीमारी के मुफत इलाज करत हे ।
ए मोबाइल मेडिकल यूनिट डहार ले 24 हजार 867 महिला मन के लैब टेस्ट करे गेहे अउ 1 लाख 29 हजार 823 महिला मन ल मुफत दवाई दे गेहे । एखर ले गरीब स्लम क्षेत्र म रहवइया अउ मेहनत मजदूरी करइया अइसे महिला जेन बेरा के अभाव या कोनो सेती ले अपन इलाज नई करा पात रिहीन , ओमन ल इलाज के सुविधा घर के तीर ही महिला चिकित्सक अउ चिकित्सा स्टॉफ के माध्यम ले मिलत हे ।
