Chief Minister Dai-Didi Clinic: 1.32 लाख ले जादा महिला मन के होइन मुफत इलाज, पढ़व
जय जोहार । मुख्यमंत्री दाई-दीदी मोबाइल क्लीनिक (Chief Minister Dai-Didi Clinic) के माध्यम ले अब तक राज्य म करीबन 1776 कैम्प लगाए गेहे। एमा रायपुर, बिलासपुर अउ भिलाई नगर निगम क्षेत्र के स्लम बस्ती म रहवइया 1 लाख 32 हजार 888 महिला अउ लईका मन ल ओखर घर के तीर ही दाई-क्लीनिक कैंप के माध्यम ले इलाज करे गेहे।
गौरतलब हे कि छत्तीसगढ़ सासन के नगरीय प्रसासन अउ विकास विभाग डहार ले मुख्यमंत्री दाई-दीदी क्लिनिक योजना (Chief Minister Dai-Didi Clinic)संचालित हे । ए योजना के तहत दाई-दीदी क्लिनिक के मोबाइल मेडिकल यूनिट के वाहन म महिला चिकित्सक अउ महिला स्टॉफ के टीम ह पहुंचत हे। उंहा जरूरतमंद महिला अउ लईका मन के विभिन्न बीमारी के मुफत इलाज करत हे ।
ए मोबाइल मेडिकल यूनिट डहार ले 24 हजार 146 महिला मन के लैब टेस्ट करे गेहे अउ 1 लाख 27 हजार 99 महिला मन ल मुफत दवाई दे गेहे । एखर ले गरीब स्लम क्षेत्र म रहवइया अउ मेहनत मजदूरी करइया महिला जेन ल कोनो सेती अपन इलाज नई करा पात रिहीन , ओमन ल इलाज के सुविधा घर के तीर ही महिला चिकित्सक अउ चिकित्सा स्टॉफ के माध्यम ले मिलत हे ।
