सुशासन तिहार 2026: स्व-सहायता समूह के महिला मन ला मिलिस 6-6 लाख के आर्थिक मदद, आत्मनिर्भरता कोती बढ़िस कदम
जन समस्या निवारण सिबिर में महिला मन ला मिलिस आर्थिक मजबूती, सुशासन तिहार बनिस रोजगार के आधार
रायपुर, छत्तीसगढ़ सरकार कोती ले आयोजित ‘सुशासन तिहार 2026’ गाँव के अर्थव्यवस्था ला मजबूत बनाए अउ महिला मन ला अपन गोड़ में खड़ा करे कोती एक बड़े पहल साबित होवत हे। मोहला-मानपुर-अम्बागढ़ चौकी जिला के विकासखंड मानपुर के अंतर्गत गाँव साल्हेभट्टी में आयोजित जनसमस्या निवारण सिबिर एकर जीता-जागता नमूना बनके आगू आईस, जहाँ एनआरएलएम (NRLM) ‘बिहान’ योजना के तहत स्व-सहायता समूह के महिला मन ला बैंक लिंकेज के जरिया धंधा-पानी सुरू करे बर करजा मंजूर करके फायदा पहुँचाए गिस।
ए सिबिर में गाँव जामड़ी के ‘पदम वैष्णव देवी स्व-सहायता समूह’ के 11 महिला मन ला मिलके मक्का (जँवरी) के खेती करे बर 6 लाख रूपिया के चेक दिय गिस। समूह के सबो महिला मन मध्यमवर्गीय किसान परिवार ले जुड़े हें अउ कतको बखत ले खेती-किसानी के काम करत हें। अब ए आर्थिक मदद ले ओमन एक साथ मिलके नवा तरीका ले मक्का के उत्पादन करहीं, जेखर ले ओखर कमाई बढ़ही अउ ओमन आर्थिक रूप ले अउ मजबूत हो सकहीं।
एही तरीका ले गाँव औंधी के ‘संत मरियम स्व-सहायता समूह’ के 10 महिला मन ला घलो 6 लाख रूपिया के चेक सौंपे गिस। ए महिला मन ह होटल के धंधा सुरू करे के योजना बनावत हें। अभी ए महिला मन स्कूल में मध्यान्ह भोजन (माड़ी-भात) बनाए के काम ले जुड़े हें, फेर अब ए करजा के मदद ले ओमन अपन खुद के धंधा सुरू करहीं अउ कमाई के नवा जरिया बनाहीं।
दोनों समूह के महिला मन के चेहरा में भरोसा अउ उत्साह साफ दिखत रहिस। ओमन सासन-प्रसासन ला धनबाद देवत कहिन कि— “सुशासन तिहार ह हमर जिनगी में एक नवा उम्मेद लेके आए हे।”
समूह के महिला मन ह कहिन कि पहिली हमन ला अपन काम ला बाढ़ाए बर साधन के कमी रहिस, फेर अब सासन के ए पहल ले हमन ला आर्थिक मदद मिल गे हे। एखर ले हमन अपन खुद के रोजगार सुरू कर पाबो अउ अपन परिवार के स्थिति ला सुधार पाबो।
सुशासन तिहार 2026 सिरिफ योजना ला चलाय तक सीमित नई हे, बल्कि ए ह समाज के हर वर्ग—खास करके महिला मन ला—मजबूत बनाए कोती एक बड़े कदम आय। ए पहल ले न केवल रोजगार के नवा मौका मिलिस हे, बल्कि महिला मन के आत्मविश्वास अउ गरब ला घलो नवा ऊँचाई मिले हे।
