रायपुर। पांच बछर पहिली होय झीरम घाटी के नक्सल हमला म शहीद होय कांग्रेसी नेता मन के 5वीं पुण्यतिथि म मुख्यमंत्री रमन सिंह ह श्रद्धांजलि अरपित करिन। उमन कहिन कि ये सबों दिवंगत मन के परिवार मन के दुख म हमन सहभागी हवन।
आघू मुख्यमंत्री ह कहिन कि नक्सली मन के ये घिनौनी हरकत के देश अउ दुनिया भर म कड़ी निंदा होय रिहिस हे। उहें नक्सली मन ह जन प्रतिनिधी मन अउ आम नागरिक के शांतिपूरन काफिला म कायरतापूरन हमला कर के ओट म अपन लोकतंत्र विरोधी गिनित मानसिकता के परिचय दे रिहन हे। सीएम सिंह के कहेना कि झीरम घाटी के नक्सल हमला म मारे गे सबो लोगन हमार अपन लोग रहिन हे। ये प्रदेश के विकास म उमन सबके अहम योगदान हे। सीएम रमन सिंह ह झीरम हमला म मारे गे पूरव केन्द्रीय मंत्री विद्याचरण शुक्ल, पूरव सांसद, प्रदेश सरकार के पूरव मंत्री महेन्द्र कर्मा, पूर्व मंत्री अउ विधायक नंदकुमार पटेल अउ पूरव विधायक उदय मुदलियार समेत सबो दिवंगत मन ल नमन करत हुए श्रद्धांजलि अरपित करिन हे। आप मन ला बता दन कि 25 मई 2013 के नक्सली मन ह बस्तर जिला के झीरम घाटी इलाका म वारदात ला अंजाम दे रिहिन हे।
