जय जोहार। (CM Bhupesh Baghel) शहीद वीर नारायण सिंह के जन्म अउ कर्म स्थली ल ओखर गौरव के अनुरूप विकसित करे बर जिला प्रसासन बलौदाबाजार-भाटापारा डहार ले सोनाखान म भव्य ओपन एयर म्यूजियम के निर्माण करे गेहे, जेखर सुभारंभ सीएम भूपेश बघेल ह करीन ।
एखर आलावा वोहा बलौदाबाजार-भाटापारा टूरिज्म सर्किट के घलो सुभारंभ करीन । ए टूरिज्म सर्किट म बाबा गुरू घासीदास के जन्म अउ कर्म स्थली गिरौदपुरी, शहीद वीर नारायण सिंह के जन्म अउ कर्म स्थली सोनाखान, कबीर पंथी के प्रसिद्ध धर्म स्थली दामाखेड़ा, तुरतुरिया, सिद्धखोल जलप्रपात, बलारडेम, सिद्धेश्वर मंदिर पलारी अउ नारायणपुर के शिव मंदिर सामिल हे । ए टूरिज्म सर्किट म अवइया पर्यटक ल विभिन्न सुविधा उपलब्ध कराए जाही ।
सोनाखान म बनाएगे ये म्यूजियम प्रदेस म पहिला म्यूजियम होही , जिहां ऑडियो- विजुअल सेटअप अउ एक ठीन विशेष धातु कॉर्टेन स्टील के माध्यम ले शहीद वीर नारायण सिंह के जीवनी ल प्रदर्शित करे जात हे । कॉर्टेन स्टील के बने लंबा अउ सुंदर पैनल्स म शहीद वीर नारायण सिंह के जीवनी उकेरे गेहे । जेखर भव्यता दिन के संग रात म घलो देखे जा सकत हे । लाइट के अद्भुत सेटअप ह एला खास अउ अलग बनात हे । सबो पैनल म एक ठीन ऑडियो सेटअप लगे हे , जेखर माध्यम ले शहीद वीर नारायण सिंह के जन्म ले लेके क्रांति अउ बलिदान ल सुने जा सकत हे ।
Other Articles
