विद्यार्थी अपन कमजोरी ल अवसर म बदलव: भूपेश बघेल

डॉ. खूबचंद बघेल महाविद्यालय के स्नेह सम्मेलन म सामिल होइन मुख्यमंत्री

रायपुर, मुख्यमंत्री भूपेश बघेल ह काली भिलाई-3 स्थित डॉ. खूबचंद बघेल शासकीय स्नातकोत्तर महाविद्यालय के वार्षिक स्नेह सम्मेलन ल सम्बोधित करत पढ़ईया लईका मन ले कहिन के अइसे कोनो लक्ष्य नइ हे, जऊन ल मनखे हासिल नइ कर सकय, जरूरत हे त केवल ईमानदार प्रयास , अऊ सही प्लानिंग के संग कड़क मेहनत करे के। मुख्यमंत्री ह पढ़ईया लईका मन ल लक्ष्य प्राप्ति बर आत्म अवलोकन करके आगू बढ़े अऊ अपन कमजोरी ल अवसर म बदले के सुझाव दीन।

मुख्यमंत्री ह इहां राष्ट्रपिता महात्मा गांधी के 150वीं जयंती के अवसर म प्रदर्शित छायाचित्र प्रदर्शनी के अवलोकन तको करिन अऊ छत्तीसगढ़ राज्य के पहिली स्वप्न दृष्टा डॉ. खूबचंद बघेल अऊ ज्ञान के देवी माता सरस्वती के तैलचित्र म माल्यार्पण अऊ दीप प्रज्ज्वलित करके स्नेह सम्मेलन के सुभारंभ करिन। मुख्यमंत्री ह कहिन के स्नेह सम्मेलन महाविद्यालय के एक उत्सव हे अउ पढ़ईया लईका मन बर अपन प्रतिभा देखाय के अवसर घलोक हे। ये एक संक्रमन काल घलोक होथे, जऊन पढ़ईया लईका मन ल परीक्षा के तइयारी करे बर तरोताजा करथे। मुख्यमंत्री ह कहिन के महात्मा गांधी के नेतृत्व म देश के आजादी के लड़ाई दुनिया के एक अइसे लड़ाई हे, जऊन बिना अस्त्र-सस्त्र के अउ सत्य अउ अहिंसा के बल म लड़े गइस। एखर से देश ल आजाद करे म कामयाबी मिलीस।

मुख्यमंत्री ह भिलाई-3 म महाविद्यालय खोले बर पूर्व विधायक दाऊ चोलाराम चन्द्राकर के जिक्र करत कहिन के प्रारंभिक सत्र म 5 कुरिया म संचालित ये महाविद्यालय अब एक भव्य भवन म संचालित होवत हे। प्राचार्य कोति ले ध्यान आकर्षित करे म श्री बघेल ह कहिन के महाविद्यालय परिसर ले अतिक्रमण हटाये जाही।

कार्यक्रम के विशिष्ट अतिथि लोक स्वास्थ्य यांत्रिकीय मंत्री गुरू रूद्रकुमार ह अपन उद्बोधन म कहिन के देश के भविष्य निर्माण अऊ व्यक्तिगत विकास बर सिक्षा जरूरी हे। महाविद्यालय के प्राचार्य डॉ. ज्योति राजे सिंह ह महाविद्यालय के सक्षणिक अउ आन गतिविधि मन ले संबंधित प्रतिवेदन के वाचन करिस। ए अवसर म महाविद्यालय के प्राध्यापकगन, स्थानीय जनप्रतिनिधि अऊ महाविद्यालयीन छात्र-छात्रा मन उपस्थित रहिन।