जय जोहार। मुख्यमंत्री भूपेश बघेल (CM Bhupesh Baghel) ह नवा सिक्षा नीति के अनुसार खेल-खेल म लईका मन के के सीखे अउ समझे के क्षमता ल विकसित करे बर अपन निवास कार्यालय म आज प्रदेश म बालवाड़ी योजना के सुभारंभ करीन हे। स्कूल सिक्षा विभाग डहार ले बालवाड़ी योजना पांच ले छः बछर तक के उमर के लईका मन बर सुरु करे गेहे ।
‘जाबो बालवाड़ी बढ़ाबो शिक्षा के गाड़ी’ के थीम के संग मुख्यमंत्री निवास कार्यालय म मुख्यमंत्री भूपेश बघेल (CM Bhupesh Baghel) ह सिक्षा मंत्री प्रेमसाय सिंह टेकाम के मौजूदगी म ए योजना के सुरुवात करीन हे । बालवाड़ी योजना के माध्यम ले लईका मन ह सीखे बर प्रोत्साहित होही अउ ओमन ल स्कूल के माहौल बर तैयार करे जा सकही । लईका मन बर हरेक बालवाड़ी म आंगनबाड़ी सहायिका के अतिरिक्त संबद्ध प्राथमिक स्कूल के एक सहायक सिक्षक के घलो तैनाती करे जाही। एखर बर सहायक सिक्षक ल हरेक माह 500 रुपिया के अतिरिक्त मानदेय घलो प्रदान करे जाही।
लईका मन ल खेल-खेल अउ रोचक तरीका ले अध्यापन कार्य कराय बर आंगनबाड़ी सहायिका अउ सिक्षक मन ल बिसेस प्रसिक्षण दे गेहे । प्रत्येक बालवाड़ी बर लईका मन के अनुकूल फर्नीचर, खेल सामग्री अउ प्रिंटरीच रंग-रोगन बर 1 लाख रुपिया के स्वीकृति घलो प्रदान करे गेहे । ए बछर 5173 बालवाड़ी सुरु करे गेहे अउ अवइया बछर म राज्य के सबो क्षेत्र म चरणबद्ध रूप ले बालवाड़ी खोले जाही ।
ए अवसर म कृषि, जल संसाधन, पंचायत अउ ग्रामीण विकास मंत्री रविंद्र चौबे, मुख्यमंत्री के सलाहकार प्रदीप शर्मा , प्रमुख सचिव स्कूल शिक्षा डॉ आलोक शुक्ला, कृषि उत्पादन आयुक्त डॉ. कमलप्रीत सिंह,सचिव स्कूल शिक्षा डॉ एस भारती दासन, विशेष सचिव कृषि डॉ.अयाज़ तंबोली,समग्र शिक्षा प्रबंध संचालक नरेन्द्र दुग्गा उपस्थित रिहीन ।
Other Articles
