Godhan Nyay Yojana : मुख्यमंत्री ह करीन गोधन न्याय योजना के हितग्राही मन ल 7 करोड़ 4 लाख रुपिया के भुगतान

जय जोहार । (Godhan Nyay Yojana) सीएम भूपेश बघेल ह आज विधानसभा के अपन कार्यालय कक्ष म कार्यक्रम म गोधन न्याय योजना के तहत पशुपालक ग्रामीण, गौठान ले जुड़े महिला समूह अउ गौठान समिति ल 7 करोड़ 4 लाख रुपिया के रासि के ऑनलाइन भुगतान करीन , जेमा 16 फरवरी ले 28 फरवरी तक गौठान म पशुपालक ग्रामीण, किसान, भूमिहीन ले ख़रीदे 2.13 लाख क्विंटल गोबर के एवज म 4 करोड़ 25 लाख रुपिया , गौठान समिति ल 1.65 करोड़ रुपिया अउ महिला समूह ल 1.14 करोड़ रुपिया के लाभांस रासि सामिल हे।

ए अवसर म मुख्यमंत्री ह किहीन कि हरेक महीना के 5 ले 15 तारीख किसान बर खास होत हे। काबर कि ए दिन ओमन ल गोधन न्याय योजना के रासि प्रदान करे जात हे । वोहा किहीन कि बड़का संख्या म गौठान स्वावलंबी होवत हे । स्वावलंबी गौठान ल प्रोत्साहित करे बर गौठान के संचालन समिति के अध्यक्ष अउ सदस्य ल मानदेय प्रदान करे के निर्णय ले गेहे । वोहा अन्य गौठान ल घलो स्वावलंबी होय के आग्रह करे हे ।

गौरतलब हे कि गोधन न्याय योजना के तहत राज्य म हितग्राही ल आज भुगतान करे गे रासि ल मिलाके अब तक 419 करोड़ 25 लाख रुपिया के भुगतान करे गेहे। छत्तीसगढ़ राज्य म 20 जुलाई 2020 ले गोधन न्याय योजना के तहत 2 रुपिया किलो म गोबर के खरीदी करे जावत हे । राज्य म 28 फरवरी 2023 तक गौठान म 107.75 लाख क्विंटल गोबर के खरीदी करे गेहे। गोबर विक्रेता ले क्रय करे गे गोबर के एवज म 215 करोड़ 50 लाख रुपिया के भुगतान करे गेहे ।