CM Bhupesh Baghel ह भक्त माता कर्मा के जयंती म करीन नमन
जय जोहार। सीएम भूपेश बघेल (CM Bhupesh Baghel) ह आज इंहा अपन निवास कार्यालय म भक्त माता कर्मा जयंती म ओखर छायाचित्र म पुष्प अर्पित कर ओमन ल नमन करीन। वोहा प्रदेस वासी मन ल भक्त माता कर्मा जयंती के बधाई अउ सुभकामना दीन अउ माता कर्मा ले प्रदेस वासी मन बर सुख, समृद्धि अउ खुसहाली के कामना करीन ।
मुख्यमंत्री श्री बघेल ह किहीन कि छत्तीसगढ़ म भक्त माता कर्मा जयंती तिहार बड़का उत्साह अउ श्रद्धा के संग मनाए जात हे । ए अवसर म साहू समाज डहार ले बिसेस रूप ले अन्य समाज के संग शोभा यात्रा अउ कलश यात्रा निकाले जात हे अउ धार्मिक-सामाजिक आयोजन घलो होत हे । वोहा किहीन कि भक्त के आस्था के सम्मान करत हुए राज्य सरकार ह भक्त माता कर्मा जयंती म सार्वजनिक अवकाश घोसित करे हे ।
ए अवसर म गृह मंत्री ताम्रध्वज साहू, उद्योग मंत्री कवासी लखमा, महिला अउ बाल विकास मंत्री अनिला भेंडिया, छत्तीसगढ़ तेलघानी विकास बोर्ड के अध्यक्ष संदीप साहू, लोकगायिका आरु साहू घलो उपस्थित रिहीन ।
