CM Bhupesh Baghel ह निकुम म नाचा महोत्सव म होइन सामिल, चेत करो तन के पुस्तक के करीन विमोचन

जय जोहार। सीएम भूपेश बघेल (CM Bhupesh Baghel) ह भेंट-मुलाकात कार्यक्रम के दउरान आज दुर्ग ग्रामीण विधानसभा के दउरा म ग्राम निकुम पहुंचीन । सीएम श्री बघेल ह इंहा स्वर्गीय दाऊ रामचंद्र देशमुख प्रदेस स्तरीय नाचा गम्मत महोत्सव म सामिल होइन । तीन दिन के नाचा महोत्सव के आज अंतिम दिन रिहीन । गृहमंत्री ताम्रध्वज साहू अउ वन मंत्री मोहम्मद अकबर घलो कार्यक्रम म उपस्थित रिहीन । सबो अतिथि ह नाचा के आनंद लीन।

ए अवसर म मुख्यमंत्री ह आयोजन समिति ल बधाई देत हुए किहीन कि छत्तीसगढ़ के कला जगत के पुरोधा स्वर्गीय डॉ रामचंद्र देशमुख जी ह राज्य के संस्कृति ल पुनर्जीवित करीन । वोहा किहीन कि देशमुख जी ह नाचा कलाकार ल नवा ढंग ले प्रसिक्षण देके सांस्कृतिक कार्यक्रम के माध्यम ले देस विदेस म अपन संस्कृति ल बढ़ावा देहे । छत्तीसगढ़ के संस्कृति ल बढ़ावा दे बर राज्य सरकार डहार ले सरलग परयास करे जावत हे ।

मुख्यमंत्री ह नाचा समिति ल प्रोत्साहन स्वरूप 10-10 हजार रुपिया दे के घलो घोसना करीन अउ किहीन कि ओखर आर्थिक स्थिति म कइसे सुधार हो, ये सुझाव विचारणीय हे। वोहा किहीन कि किसान अन्नदाता के रूप म पहचाने जात हे । छत्तीसगढ़ ह देस के इकलौता अइसे राज्य हे, जिहां इनपुट सब्सिडी अउ समर्थन मूल्य मिलाके किसान क धान के सबले जादा मूल्य दे जावत हे।

अवइया खरीद सीजन ले समर्थन मूल्य म धान खरीदी 15 क्विंटल ले बढ़ाके 20 क्विंटल करे जावत हे। वोहा भूमिहीन कृषि मजदूर न्याय योजना सहित अन्य योजना के बारे म ग्रामीण ल जानकारी दीन। ए अवसर म वोहा पद्मश्री डोमार सिंह कुंवर अउ दीपक तारम ल स्मृति चिन्ह देके सम्मानित करीन अउ मंच म “चेत करो तन के” पुस्तक के विमोचन घलो करीन ।