मुख्यमंत्री विष्णुदेव साय ह 515 नवा पैक्स समिति मन के कल करहि वर्चुअल सुभारंभ

सहकारिता ले मजबूत होही गांव के अरथबेवस्था – मंत्री केदार कश्यप

रायपुर. छत्तीसगढ़ में सहकारिता ला नवा दिसा देय अउ किसान मन ला मजबूत बनाए के उदेस ले एक बड़े कदम उठाए गे हे। केंद्रीय सहकारिता मंत्री अमित शाह के मारगदरसन में सहकारिता विभाग डाहर ले 515 नवा प्राथमिक कृषि साख सहकारी समिति (पैक्स) बनाए गे हे। ए समिति मन के वर्चुअल सुभारंभ कल 15 अप्रैल के मुख्यमंत्री विष्णुदेव साय ह मंत्रालय महानदी भवन, नवा रायपुर अटल नगर ले करिहें।

ए कार्यक्रम में मुख्यमंत्री विष्णुदेव साय ह मुख्य अतिथि के रूप में सामिल होहिं, जबकि सहकारिता मंत्री केदार कश्यप ह कार्यक्रम के अध्यक्षता करहि। कार्यक्रम के सुरूआत सहकारिता विभाग के सचिव डॉ. सी.आर. प्रसन्ना के सुवागत भासन ले होही अउ अधियछीय भासन देवत हुए सहकारिता मंत्री केदार कश्यप ह परदेस में सहकारिता के बिस्तार अउ ओखर ले होय वाला फायदा मन के बारे में बताहिं।

सहकारिता मंत्री केदार कश्यप ह कहिन हें कि नवा पैक्स समिति मन के बने ले किसान मन ला करजा (ऋण), खाद, बीजा अउ खेती-किसानी के दूसर सुविधा मन अब अपन गांव-घर के तिर (स्थानीय स्तर) में आसानी ले मिल जाही। एखर ले हमर अन्नदाता किसान मन ला अब दूरिहा जाय के जरूरत झन पड़ही अउ समय संग संसाधन के घलो बचत होही। संग ही, किसान मन ला सरकारी योजना मन के सीधा फायदा मिल सकही। ओमन बताइन कि ए कदम ले सरकारी योजना मन के बने ले संचालन होही अउ ओखर लाभ सीधा गांव-देहात तक पहुंचही। एखर ले किसान मन के आय बाढ़ी अउ गांव के चहुंमुखा विकास ला गती मिलही। सहकारिता मंत्री श्री कश्यप ह कहिन कि केंद्र सरकार के ए पहल ह छत्तीसगढ़ में सहकारिता के ढांचा ला मजबूत करत हुए आत्मनिर्भर ग्रामीण-अरथबेवस्था बनाए के डाहर एक बड़े कदम साबित होही।

ए मउका में मुख्यमंत्री विष्णुदेव साय ह अपन भासन में राज्य सरकार के किसान मन के हित वाले नीति अउ सहकारिता ऊपर अधारित विकास मॉडल के बारे में बताहिं। छत्तीसगढ़ के सहकारी जनप्रतिनिधि मन, अपेक्स बैंक, जिला सहकारी केंद्रीय बैंक के अध्यक्ष, उपाध्यक्ष, पैक्स सोसाइटी के प्रतिनिधि, सहकारिता विभाग के संभागीय संयुक्त पंजीयक, जिला उप पंजीयक अउ सहायक पंजीयक, अपेक्स बैंक अउ जिला सहकारी केंद्रीय बैंक के अधिकारी मन वर्चुअल माध्यम ले सीधा ए सुभारंभ कार्यक्रम में जुड़हिं।

बता दन कि प्रधानमंत्री नरेन्द्र मोदी के सपना ला पूरा करे बर ‘सहकार ले समृद्धि’ के पहल के तहत छत्तीसगढ़ में 515 नवा पैक्स के गठन करे गे हे। केंद्रीय गृह अउ सहकारिता मंत्री अमित शाह अउ मुख्यमंत्री विष्णुदेव साय के मारगदरसन में छत्तीसगढ़ में सहकारिता के योजना मन ला अउ अऊ आसानी ले मनखे मन तक पहुंचाए बर बहुउद्देश्यीय पैक्स सोसायटी के पुनर्गठन करे गे हे। प्राथमिक कृषि साख सहकारी समिति (पैक्स) ला फेर ले जमा के (पुनर्गठन कर) 515 नवा पैक्स बनाए गे हें। ए 515 पैक्स मन में कतको किसम के सेवा (बहुउद्देश्यीय सेवा) दिय जाय जाही। 2058 पुराना बहुउद्देश्यीय पैक्स अउ नवा बने 515 पैक्स ला मिला के छत्तीसगढ़ में अब कुल 2573 पैक्स सोसायटी हो जाही।