साड़ी के गुणवत्ता ऊपर सरकार सख्त
मंत्री राजवाड़े के निर्देश ऊपर जांच तेज
प्रबंध संचालक खादी अउ ग्रामोद्योग बोर्ड ला पत्र जारी
दोस मिले ऊपर कारवाही अउ साड़ी मन ला बदले के निर्देश
रायपुर. राज में आंगनबाड़ी कार्यकर्ता अउ सहायिका मन ला बांटे गे साड़ी के क्वालिटी (गुणवत्ता) ला लेके आघू आय सिकायत मन ऊपर छत्तीसगढ़ सरकार ह कड़ा रुख अपनाय हे। महिला अउ बाल विकास मंत्री लक्ष्मी राजवाड़े ह ए मामला ला गंभीरता ले लेवत एकर गहिर जांच करे के निर्देश दीन हें।
मंत्री श्रीमती राजवाड़े के निर्देश ऊपर महिला अउ बाल विकास विभाग के संचालक ह छत्तीसगढ़ खादी अउ ग्रामोद्योग बोर्ड के प्रबंध संचालक ला चिट्ठी लिख के तुरते जरूरी कारवाही करे बर कहे हे। चिट्ठी में साफ करे गे हे कि साल 2024-25 में साड़ी बांटे बर जारी करे गे खरीदी आदेस के तहत कतको जिला मन ले क्वालिटी में कमी अउ तय मापदंड मन में गड़बड़ी के सिकायत मिले हे।
विभागीय स्तर में बने जांच समिति डाहर ले करे गे जांच में कतको जगह नियम अउ मानक ले हट के काम होय के पुस्टी घलो होय हे। एकर बाद अब मामला में कारवाही के काम ला तेज कर दे गे हे। संचालक महिला अउ बाल विकास डाहर ले जारी चिट्ठी में खादी अउ ग्रामोद्योग बोर्ड ला निर्देश दे गे हे कि ओमन अपन स्तर में तकनीकी बिसेसग (विशेषज्ञ) मन के टीम बना के साड़ी मन के क्वालिटी के फेर ले जांच करावंय। यदि जांच में मापदंड ले कोनो घलो किसम के गड़बड़ी मिलही, त जुड़े हुए एजेंसी अउ सामान सप्लाई करे वाला मन के खिलाफ नियम के मुताबिक कड़ा कारवाही करे जाही।
एखर साथ ही, जे-जे जगह में खराब क्वालिटी के साड़ी बांटे गे हे, वहां ओमन ला तुरते वापस लेके बने क्वालिटी के नवा साड़ी देय के निर्देश घलो दे गे हे। विभाग ह ए घलो साफ कर दिस हे कि कुछ मनखे मन ए मामला ला लेके गलत अउ नकारात्मक परचार करत हें, जबकि सच ये हे कि सरकार ह पूरा मामला ला धियान में रख के साफ-सुथरा ढंग ले जरूरी कारवाही करत हे।
