चार महीना ले नई मिले रिहिस वेतन.. सीएम बघेल के दखल.. चार अधिकारी ल शो-कॉज नोटिस.. वेतन देके घलो निर्देश

बिलासपुर. जिला के नगर पालिका परिषद तखतपुर म कार्यरत गुरुजी (नगरीय निकाय) मन ल पाछू के चार महीना ले वेतन नई मिले रहिसि। प्रदेश के मुखिया भूपेश बघेल ल एखर जानकारी ट्वीटर के जरिया होईस जेखर बाद ओमन ह फौरन मामला के संज्ञान लेत संचालक नगरीय प्रशासन अऊ विकास विभाग ल ऐ गुरुजी मन के वेतन ल जारी के करे के निर्देश दिन।

गुरुजी मन ल वेतन के इंतजार करवईया अधिकारी मन उपर घलो गाज गिरत हे। सीएम बघेल के निर्देश मिले बाद अधिकारी मन संबंधित अधिकारी मन ल ऐ मामला म नोटिस जारी करे हे। नगरीय प्रशासन विभाग ह मामला म चार अधिकारी मन बर शो-कॉज नोटिस जारी करे हे जेखर जवाब ओमन ल 3 दिन के भीतर देना हे।

कोन कोन ल जारी होहे नोटिस?

नगरीय प्रशासन विभाग के संयुक्त संचालक पीबी काशी, अनुदान शाखा के कार्यपालन अभियंता श्याम पटेल, तखतपुर के सीएमओ प्रह्लाद पांडेय अऊ अनुदान शाखा के अधिकारी ईश्वर ताम्रकार ल नोटिस जारी करे गे हे।

अऊ मामला म घलो संवेदनशीलता दिखा चुके हे सीएम बघेल

इही नहीं सीएम के कुर्सी संभाले के बाद मुख्यमंत्री भूपेश बघेल ह कई मामला म संवेदशीलता के परिचय देत पीड़ित मन बर बड़ सुग्घर फैसला ले हे। कुछ दिन पहिली राजनांदगांव म बिजली कटौती ले परेशान एक मनखे द्वारा करे गे टिप्पणी के बाद ओखर खिलाफ राजद्रोह के मामला पुलिस ह दर्ज कर ले रिहिस फेर सीएम बघेल के कड़ा फटकार के बाद ओ मामला ल हटा दे गे रिहिस। इही नहीं बस्तर म आदिवासी मन के जमीन वापस दिलाए के मामला हो या अन्य मामला जेमा सीएम बघेल के संवेदनशील दिखे रिहिस।