दीवार भसके ले दबके लइका के मउत, पीड़ित परिवार ल दिस चार लाख के सहायता राशि

जगदलपुर। बस्तर इलाका म लगातार भारी पानी गिरत हे। बीते रात म जगदलपुर म एक ठन घर के दीवार ह भसक गे, जेमा दबके एक झन 11 साल के लइका के मउत हो गे। जइसने ये खबर ह जिला प्रसासन तक मिलिस तांहन अधिकारी मन घटनास्थल म पहुंच के पीड़ित परिवार ल तत्काल सहायता राशि प्रदान करिस हे।

बतात हे कि बीते रात जगदलपुर के संजय गांधी वार्ड म कैलाश बघेल के घर के एक ठन दीवार ह भसक गे, जेमा उंखर बेटा 11 साल के शैलेष के दब के मउत हो गे। आज जईसे ही ये सूचना जिला प्रशासन के अधिकारी मन ल मिलिस तांहन वो मन ह घटनास्थल पहुंचिस हे। फेर घटना के रिपोर्ट बनाए कलेक्टर ल सौंपिन हे, तेखर बाद कलेक्टर डॉ. अय्याज तम्बोली ह तत्काल 4 लाख रूपिया के सहायता राशि के स्वीकृति प्रदान करिन हे।

विधायक जगदलपुर रेखचंद्र जैन, महापौर जतीन जायसवाल अउ जगदलपुर के एसडीएम जीआर मरकाम ह मंझनिया कन मौका म पहुंच के पीड़ित परिवार ल चार लाख रूपिया के चेक दिन हे।