हांसत-खेलत अस्पताल पहुंचिस लइका, इंजेक्शन लगिस अउ कान-नाक ले फेंक डरिस गेजरा, होगे मौत

बिलासपुर। कीरा चाबे रिहिस, बच्चा हा हांसत-खेलत अस्पताल पहुंचिस, लेकिन एक ठन इंजेक्शन लगे के बाद कान-नाक ले गेजरा फेंक डरिस अउ ओकर मौत होगे। ये घटना छत्तीसगढ़ के मुंगेली जिला के लोरमी के आय। लइका के मौत

जानकारी मिले हे कि लोरमी विकासखंड के सरईपतेरा गांव के सात वर्षीय संदीप पिता मनोज साहू ला इतवार के कुछु कीरा चाब दिस। परिजन मन ओला 108 एंबुलेंस ले लोरमी के सरकारी अस्पताल लेगिन।

रात के ड्यूटी म तैनात डॉक्टर पंकज कंवर हा संदीप ला एंटी स्नैक बाइट इंजेक्शन लगा दिस। एकर कुछ घंटा बाद बच्चा के हालत बिगड़े लगिस। ये दौरान बच्चा हा रात 8 बजे ले 12 बजे तक अस्पतालेच म रिहिस।

परिजन मन के कहना हे कि जब बच्चा ला अस्पताल म भर्ती कराए गे रिहिस हे, ओ समय वो हा हांसत-खेलत रिहिस हे। इंजेक्सन लगे के कुछ घंटा बाद अचानक ओकर मुंहू अउ नाक ले गेजरा निकलना सुरू होगे। पूरा सरीर हा पसीना म भीग गे अउ रात करीब 12 बजे बच्चा के मौत होगे।

परिजन मन के आरोप हे कि डॉक्टर मन लापरवाही करिन, तबीयत बिगड़े के बाद भी बच्चा ला रेफर नई करे गिस। यहू आरोप हे कि बीएमओ डॉ. जीएस दाऊ के निर्देस म सोमवार सुबह 8 बजे ही तुरत-फुरत पोस्टमार्टम करा के बच्चा के सव ला गांव रवाना कर दिए गिस।

मामला म बीएमओ डॉ. जीएस दाऊ के कहना हे कि बच्चा ला देखे म सांप काटे के लक्षण दिखत रिहिस हे, जेकर इलाज करे गिस, लेकिन ओला बचा नई सकेन। रेफर करे के पहिली ही बच्चा के मौत होगे।