सूरजपुर नगर पालिका के स्वच्छता दीदी मन के होइस सम्मान, सेनेटाइजर के करे गिस वितरण

जय जोहार अंबिकापुर…. कोरोना के वैश्विक महामारी के बीच स्वच्छता अभियान ल जारी रखइया कोरोना योद्धा अऊ दीदी मन के आज सम्मान करे गिस। नगर पालिका अध्यक्ष केके अग्रवाल ह सबो ल एक-एक साड़ी सेट, टोपी, मास्क अऊ मिठाई के डिब्बा दे के सम्मानित करिन। गौरतलब हे कि एखर पूर्व घलो नगर पालिका प्रबंधन के तरफ ले स्वच्छता श्रृंगार के तहत दीदी मन ल साड़ी सेट, टोपी, मास्क, जूते अऊ मोजे दे गे रहिस।

नपा अध्यक्ष ह बताइस कि नपा के स्वच्छता कर्मचारी अऊ कमांडो टीम ल घलो अध्यक्ष निधि ले जूते, मोजे, लोवर, टीशर्ट, मास्क प्रदान करे के निर्देश दे गे हे। ऊहचे नगर के सबो वार्ड म पार्षद मन के माध्यम ले सेनेटाइजर के घलो वितरण करे जात हे।

ए अवसर म नपा उपाध्यक्ष रितेश गुप्ता, विधायक प्रतिनिधि सुनील अग्रवाल, प्रेस क्लब अध्यक्ष प्रवेश गोयल, पीआईसी सदस्य वीरेंद्र बंसल आदि उपस्थित रहिस।