cm भूपेश बघेल ह करिन घोसना, राज्य म सुरू होही इंदिरा वन मितान योजना

जय जोहार…. आदिवासी दिवस के मउका म सीएम (cm) भूपेश बघेल ह बड़का घोसना करे हे।

वो हा कहिन कि राज्य म वनवासी मन के खुशहाली अउ वनांचल के गांव ल स्वावलंबी बनाय के उद्देश्य ले इंदिरा वन मितान योजना ल सुरु करे जाही।

ए योजना म राज्य के आदिवासी अंचल के 10 हजार गांव म युवा मन के समूह ल गठित कर ओखर माध्यम ले वनोपज के खरीदी,

ओखर प्रसंस्करण अउ मार्केटिंग के व्यवस्था करे जाही।

राज्य के हरेक आदिवासी विकासखण्ड म वनोपज प्रसंस्करण केन्द्र के स्थापना करे जाय के लक्ष्य रखे गे हे।

सीएम (cm) भूपेश बघेल ह कहिन कि अनुसूचित क्षेत्र के 10 हजार गांव म ए योजना के तहत समूह ल गठित करे जाही।

हरेक समूह म 10 ले 15 सदस्य होही। ए योजना म अनुसूचित क्षेत्र के 19 लाख परिवार मन ल जोड़े के लक्ष्य हे।
सीएम (cm) भूपेश बघेल ह कहिन कि ए योजना ले समूह ल वृक्ष प्रबंधन के अधिकार प्रदान करे जाही। जेखर ले ओ ह वन क्षेत्र के वृक्ष ले वनोपज संग्रहण कर के आर्थिक लाभ ले सके।
वनोपज के खरीदी के व्यवस्था ल समूह के माध्यम ले करे जाही। जेखर ले वनोपज के सही दाम मिल सके। समूह के माध्यम ले लोगन मन बर स्वरोजगार के नवा अवसर निर्मित होही।