पीएम मोदी के सीएम बघेल ह करिन स्वागत, जानव का का कहिन….

राजधानी के साइंस काॅलेज मैदान म आयोजित पीएम नरेंद्र मोदी के शासकीय कार्यक्रम म सीएम भूपेश बघेल ह कहिन कि ए हमर बर खुसी के बात आए कि प्रधानमंत्री छत्तीसगढ़ के दउरा म आए हें। छत्तीसगढ़ के धरा म उंखर स्वागत हे. भगवान राम के ननिहाल अऊ माता कौशल्या के मंदिर म पीएम मोदी के स्वागत हे.

सीएम बघेल ह कहिन कि प्रधानमंत्री ले हमन एक मंच म मिलत रेहेन, छत्तीसगढ़ के विकास के संबंध म नीति आयोग के बैठक के संगे-संग निवास कार्यालय अऊ पत्राचार के माध्यम ले मांग करते रेहेन। अऊ ओ मांग ल में फेर दोहराना चाहत हों। हमर गडकरी जी संग घलो बैठक होए हे अऊ जतेक मांगथों ओ ह ओखर ले जादा देथे।

सीएम भूपेश बघेल ह कहिन कि छत्तीसगढ़ म सरलगहा विकास के गति ह आगू बाढ़त हे। हमर राज्य नवा राज्य आए। जादा ले जादा राशि छत्तीसगढ़ ल मिले, इही ए बेरा म कहना चाहत हों। ए बेरा म मुख्यमंत्री भूपेश बघेल ह प्रधानमंत्री नरेंद्र मोदी ल स्मृति चिन्ह के रूप म छत्तीसगढ़ के कारीगर मन कोती ले तियार अंगवस्त्र अऊ मिलेट्स के टोकरी घलो भेंट करिन।