जय जोहार…. मुख्यमंत्री भूपेश बघेल ह प्रधानमंत्री नरेंद्र मोदी ल पत्र लिखे हे। एमा श्रमिक, आन व्यक्ति मन के अंतर्राज्यीय परिवहन अऊ राज्य के भीतर एक स्थान ले दूसर स्थान म होवइया परिवहन व्यय के भुगतान बर राज्य आपदा मोचन निधि म समुचित प्रावधान करे के अनुरोध करे हे।
मुख्यमंत्री भूपेश बघेल ह पत्र म लिखे हे कि राज्य म 1.50 लाख ले जियादा श्रमिक अऊ आन व्यक्ति ह अन्य राज्य म अवरुद्ध हे अऊ लाकडाउन के सती अपन गृहराज्य छत्तीसगढ़ के वापसी बर व्यग्र हे। आन राज्य ले श्रमिक मन के वापसी प्रक्रिया ह सुरू हो चुके हे। करीब 27 हजार ले जियादा श्रमिक ह खुद के साधन अऊ राज्य शासन के तरफ ले उपलब्ध कराये गे बस सुविधा ले गृह राज्य लहुट चुके हे।
एखर अतिरिक्त करीब एक लाख 32 हजार श्रमिक मन ल ट्रेन अऊ बस के माध्यम ले लाय के प्रक्रिया हे 11 मई ले प्रारंभ हो चुके हे। श्रमिक बर रेल अऊ बस परिवहन म हुये व्यय के भुगतान ल राज्य आपदा मोचन निधि ले करे जाये के प्रावधान ह वर्तमान म नई हे। राज्य शासन के तरफ ले छत्तीसगढ़ होके आन राज्य ल जवइया श्रमिक मन बर घलो भोजन, पानी अऊ संबंधित राज्य के सीमा तक बस म छोड़े जाये के उपाय सुनिश्चित करे गे हे। श्रमिक मन के परिवहन अऊ आन सुविधा म बड़का राशि व्यय होय के संभावना हे।
